Февзи Якъубов адына Къырым муэндислик ве педагогика университетинде Къырым Джемаат палатасынынъ азалары ичюн «Девлет ве беледие идаресинде суний интеллект ве малюмат хавфсызлыгъы» серлевхалы ихтисас юксельтюв программасы екюнленди. Курс динълейиджилери арасында Къырым Муфтисининъ муавини, Джемаат палатасынынъ азасы Раим Гъафаров да бар эди.
Окъув черчивесинде девлет хызметинде суний интеллектнинъ имкянларына, къулланылувынынъ укъукъий сынырларына ве нейроагълар иле чалышув эснасында малюмат хавфсызлыгъына багъышлангъан дерслер кечирильди. Окъувнынъ амелий къысымына мураджаатларны ве протоколларны азырламакъ, малюматны суний интеллект ярдымынен инджелемек ве марузаларнынъ корьгезмелик къысымыны азырламакъ меселелери кирди.
Программанынъ сонъунда иштиракчилерге ихтисас юксельтилюви боюнджа шеадетнамелер берильди. Ишбу окъув иштиракчилерининъ профессиональ фаалиетлеринде суний интеллектнен чалышувны менимсемелери ве илериде къулланмалары ичюн муим бир адым олды.
Къырым МДИ матбуат хызмети