Къырым мусульманлары Муфтисининъ муавини Мухаммед Исламов Къырым Джумхуриети боюнджа Русие Федерациясы Адлие назирлигининъ янындаки координация шурасынынъ топлашувында иштирак этти. Корюшюв эснасында алиментлернинъ алынмасында иджраий весикъаларнынъ къулланылувынен багълы актуаль проблемалар бакъылып чыкъылды ве келеджек ярымйылгъа иш планы тасдикъ этильди.
Мухаммед Исламов алиментлернинъ тёленмемесинен алякъалы актуаль ичтимаий мевзу боюнджа марузасынен чыкъышта булунды. Озь чыкъышында, о, ана-бабаларнынъ балалары огюндеки месулиетини айрыджа къайд этти. Муфти муавини меселенинъ тек къанун джеэтине дегиль де, диний тарафына да мураджаат этти.
«Ислям ана-бабаларгъа, хусусан, бабаларгъа баланынъ хавсызлыгъы ве тербиеси меселесинде буюк месулиет юклей. Динимиз балаларымыз ичюн месулиетли олмакъ, оларны бакъмакъ ве аятларында фааль иштирак этмек кереклигимизни огрете. Бу месулиеттен къачмакъ тек къанун бозулувы дегиль, эм де буюк гунахтыр. Къырым мусульманлары диний идареси ве имамларымыз хутбелеринде къоранта муэссисесининъ сакъланувы ве пекитильмеси кереклиги, бунынъ эмиети акъкъында даима айталар. Балаларны бакъмакъ, ихтияджларыны къаршыламакъ исе, – бу меселенинъ темелидир», – деп, къайд этти Мухаммед Исламов.
Диний идаремизнинъ бойле мушаверелерде иштирак этмеси, девлет органларынынъ ве диний муэссиселернинъ гъайретлерини бирлештирип, муим ичтимаий проблемаларны аль этмек меселесинде комплексли чезювнинъ ишлеп чыкъарылмасына ярдым эте.
Къырым МДИ матбуат хызмети