Акъмесджите Къырым Джумхуриетинде 2025 сенесининъ идманджы йылы олмасы черчивесинде яшларда сагълыкълы омюр тарзыны, ватандашлыкъ мевамыны ве маневий-ахлякъий къыйметлерини шекиллендирювде спортнынъ ролю мевзусына багъышлангъан тёгерек маса кечирильди.
Къырым Джумхуриети ве Севастополь шеэри мусульманлары диний идаресинден тедбирде Къырым Муфтисининъ муавини Раим Гъафаров иштирак этти.
Тёгерек масанынъ эсас вазифеси – спортнынъ инкишафы ве спортчуларнынъ ахлякъий тербиеси саасында, ве, эм де, маневий рехберлик векторларыны бельгилевде Къырымдаки девлет сиясетинде догъру ургъуны бельгилемек олды.
Музакерелерде Къырым Джумхуриети Девлет Шурасы башлыгъынынъ муавини, Къырым Джумхуриетинде Медениет, медений мираснынъ сакъланувы ве спорт боюнджа девлет комитетининъ башлыгъы Алла Пономаренко, Къырым Джумхуриетининъ спорт назири Ольга Торубарова, Къырым Джумхуриети спорт назирининъ муавини Сергей Гниздыло, Ичтимаий незарет ве тюкеджилернинъ акъларыны къорчалав комиссиянынъ реиси Олег Егоров, Ветеранларгъа дестек, къорантаны, балаларны ве аньаневий аиле къыйметлерини сакълав боюнджа комиссиясынынъ реиси Ольга Собещанская, Яшлар, кутьлевий спорт ве туризм боюнджа комиссиясы реисининъ муавини Николай Горбунов, Къырым Джумхуриети Джемаат Палатасынынъ Яшлар, кутьлевий спорт ве туризм боюнджа комиссиясынынъ башлыгъы Ольга Безугловец, Акъмесджит ве Къырым Епархиясынынъ векиллери, спорт тешкилятларынынъ ве яшлыкъ меркезлерининъ рехберлери иштирак эттилер.
Тедбирнинъ сонъунда тёгерек масанынъ иштиракчилери спорт ве диний тешкилятларынынъ ишбирлиги, спортта маневий рехбериетнинъ инкишафы, спорт лейхалары вастасынен темель къыйметлернинъ ашыланмасы, спортчулар ве идманджыларнынъ ичтимаий месулиетлерини юксельтюв мевзуларында амелий тевсиелерни ишлеп чыкъардылар.
КЪМДИ МДТ матбуат хызмети