Къырым Муфтилигининъ конференция залында «Къырымтатарларнынъ четэльде яшагъан семетдешлеринен алякъаларнынъ инкишафы» серлевхалы халкъара тёгерек маса олып кечти. Тедбир Русие Федерациясы Тышки ишлер назирлигининъ тешеббюси ве Къырым Джумхуриети ве Севастополь шеэри мусульманлары диний идареси иле Къырым Джумхуриети Миллетлерара мунасебетлер боюнджа девлет комитетининъ дестеги иле кечирильди.
Форум иштиракчилерине видеобагъ вастасынен Къырым Джумхуриети Назирлер шурасы Башлыгъынынъ муавини, Русие Федерациясы Президенти янында Къырым Джумхуриетининъ Даимий темсильджиси Георгий Мурадов мураджаат этти.
Къырым Джумхуриети ве Севастополь шеэри Муфтиси хаджы Эмирали Аблаев Тюркиеден ве Озьбекистандан кельген мусафирлерни шахсен селямлады. Озь чыкъышында Муфти эфенди бойле музакере мейданчыкъларынынъ муимлигине айрыджа ургъу япты. О, бильдирди ки, бугунь къырымтатарларнынъ бирлешме меркези олгъан Къырым Муфтилиги ичюн четэльде яшагъан къырымтатарларнен достлукъ копюрлерини къурмакъ макъсадынен бойле тёгелерек масаларны кечирмек пек муимдир.
«Чокъ йыллар девамында Къырым Муфтилиги садедже диний маариф лейхаларыны кечирмекте къалмайып, эм де, диний-ахлякъий къыйметлеримизнинъ сакъланылмасына, яшларымызда ватанперверлик дуйгъуларынынъ тербие этильмесине, Махсус арбий операция иштиракчилерининъ къоранталарына ве джебхедеки аскерлеримизге дестек косьтерильмесине ёнелик тахсилий ве медений тедбирлерни аяткъа кечире», – деди Къырым Муфтиси хаджы Эмирали Аблаев.
Зияретлери черчивесинде Озьбекистандан ве Тюркиеден кельген эйетлер ве къырымтатар джемаатчылыгъынынъ векиллери Буюк Джума джамини де кездилер. Мусафирлер ярымаданынъ баш мусульман мабедини корип, онынъ къырымтатар халкъынынъ медений ве маневий бирлигини темсиль эткен айры муитини ис эттилер.
Ишбу тёгерек маса ачыкъ диалог, фикирлернинъ пайлашувы ве Ватан иле четэль диаспора арасындаки багъларнынъ пекинмеси ичюн конкрет механизмлерни ишлеп чыкъмакъ мейданы олды.
Къырым МДИ матбуат хызмети