Рамазан айынынъ сонъки кунюнде, Ораза байрамынынъ арефесинде Къырымда Къырым Муфтиси хаджы Эмирали Аблаев адындан буюк джумхуриет ифтар кечирильди. Тедбирде фаркълы зенаат саилери, джемаат фаалиетчилери, акимиет векиллери ве дин эрбаплары топландылар.
Мусафирлер огюнде Къырым Джумхуриети ве Севастополь шеэри Муфтиси хаджы Эмирали Аблаев сёзге чыкъты. О, топлангъанларны оразанынъ сонъки кунюнде селямлады.
«Биз Рамазаннынъ сонъки кунюнде берабердже ифтар этмек ичюн, бу акъшам юреклеримизни келеджек Рамазангъа къадар къыздырсын деп топландыкъ. Коремиз ки, джамилеримиз бутюн Рамазан айы девамында толуп ташты, куньлеримиз ве геджелеримиз ибадетлернен толу кечти. Ибадетлер къылдырып, насиат этип, инсанларны бирлештирип, джемиетимизге хызмет эткен имамларымызгъа буюк тешеккюрлер бильдирем», – деди хаджы Эмирали Аблаев.
Муфти эфенди ярымадада миллетлерара ве динлерара барышыкълыкъны сакъламакъ ичюн дин эрбапларынынъ муим ролюни айрыджа къайд этти.
«Бугунь Къырымда укюм сюрьген бирлик, муаббетлик ве эйи къомшулыкъ буюк ольчюде имамларымызнынъ эмегидир. Олар инсанларгъа керчек бильгилерни огретелер, мерхаметлик ве къаршылыкълы урьмет принциплерини анълаталар», – деп, къайд этти о.
Озь чыкъышында Муфти эфенди Русие Федерациясынынъ Президенти Владимир Путинге ве Къырым Джумхуриетининъ рехберлигине Къырымда динимизни сербест кутьмек имкянымыз ичюн буюк тешеккюрлер бильдирди. Айры тешеккюрлер Ватан къоруйыджылары ичюн айтылды, айны олар барышыкълыкъны ве тынчлыкъны темин этип, инангъанларгъа ибадетлерини сербест ерине кетирмеге имкян берелер.
«Атеш» къырымтатар оюн ансамблининъ чыкъышлары акъшамнынъ медений ярашыгъы олды. Бунъа иляве оларакъ, акъшам девамында «Мерхаметлик лялеси» хайрие акциясынынъ махсулатлары такъдим этильди. Хайрие акциясына эр бир мусафир къошулып олды.
Къырым МДИ матбуат хызмети