Къырым Джумхуриети ве Севастополь шеэри Муфтиси хаджы Эмирали Аблаев Херсон виляетинде дронларнынъ дарбеси иле сырадан ватандашларнынъ эляк олмасына себеп олгъан террористик уджумны яманлады.
Къырым мусульманларынынъ диний етекчиси эляк олгъанларнынъ къоранталарына ве якъынларына ичтен тазие бильдирди, зарар корьгенлерге исе, шифалар тиледи.
«Биз, мусульманлар, бу дехшетли дарбе нетиджесинде эляк олгъанларнынъ якъынлары иле бирликте кедер ичиндемиз. Инсанлар вахший бир уджюм нетиджесинде эляк олдылар, бу буюк джанаварлыкъны акълайджакъ ич бир шей ёкътыр. Ислям – барышыкълыкъ динидир, ве динимиз къабаатсыз инсанларгъа, олар къайда олса, олсун, ким оны япса, япсын, уджюм этмекни къатиен ясакъ эте», – деп, къайд этти Муфти эфенди.
Къырым МДИ матбуат хызмети