Динлерара иш группасынынъ иши черчивесинде Къырым Муфтисининъ муавини Мухаммед Исламов №1 тюзетюв колониясынынъ рехбери, ич хызметининъ полковники Дмитрий Карнаухнен корюшти. Корюшюв эснасында тарафлар агъымдаки йылнынъ сонъуна къадар джезаларыны чеккен мусульманларгъа дестек косьтермек макъсадынен ишбирлик меселелерини музакере эттилер.
Мухаммед Исламов аписханедеки джамининъ фаалиетинде актив иштирак эткен мусульманларнынъ, муэссиседеки маневий инкишафкъа ве ичтимаий фаалиетке мусбет иссе къошкъанлары ичюн, такъдир этильмесини риджа эткен бир мектюпни теслим этти. О, махкюмлернинъ гонъюллерини котермек ве оларны нормаль аяткъа къайтармакъ ичюн бойле тешеббюслерге дестек бермекнинъ муимлигине ургъу япты.
Бундан да гъайры, Муфти муавини колониядаки джамининъ тамирленмеси ичюн Къырым мусульманлары диний идареси адындан даимий эсаста къуруджылыкъ мальземелери ёлланылгъаныны бильдирди.
Корюшюв достане муитте кечти, эки тараф илеридеки семерели ишбирликке умютини бильдирдилер.
Къырым МДИ матбуат хызмети