Къырым Муфтисининъ муавини, Къырым Джумхуриети Джемаат палатасынынъ азасы Раим Гъафаров иш зияретинен Ислям Терек районыны зиярет этти. Зиярет эснасында о, ерли имамларнен ве мусульман дин джемиетлерининъ реислеринен корюшип, районнынъ янъы баш имамы Усеин Арабаджыны такъдим этти.
Зиярети черчивесинде о, Ислям Терек районы мемуриетининъ башлыгъы Елена Янчукова ве муниципаль тешкилятнынъ башлыгъы, Ислям Терек район шурасынынъ реиси Елена Гуцулнен корюшти. Тарафлар бирдемликлерининъ къурулмасына, къомшусевер мунасебетлернинъ пекитильмесине ве районда джемаат аятынынъ инкишаф этмесине ёнелик берабердже арекет ве ишбирлик боюнджа меселелерни музакере эттилер.
Айры дикъкъат мусульман джемиети ичюн актуаль меселелерге, эм де маневий-ахлякъий тербие, къорантагъа ве яшларгъа дестек, муим джемаат тедбирлерининъ кечирилюви саасында умумий тешеббюслернинъ перспективаларына айырылды.
Зиярет нетиджесинде тарафлар илериде ишбирликке ве джемиетнинъ ичтимаий аяты ичюн муим олгъан актуаль меселелер боюнджа даимий диалогны къурмагъа азыр олгъанларыны бильдирдилер.
Бундан да гъайры, Раим Гъафаров Ислям Терек районындаки Арбий ве эмек шухрети музейини зиярет этип, больгенинъ тарихыны, сакинлерининъ иш наалиетлерини ве тувгъан улькенинъ илерилемесине къошкъан исселерини косьтерген экспозициясынен таныш олды. Бунъа иляве оларакъ, Муфти муавини «Наалиетлер адасы» серги залыны зиярет этип, беледие сакинлерининъ тешеббюслери ве омюр наалиетлеринен таныш олды.
Къырым МДИ матбуат хызмети