Акъмесджиттеки Буюк Джума джамиде тантаналы муитте хафызлыкъ болюгининъ мезунларына дипломлар берильди. Имам Матуридий адына Къалай ислямий илимлер медресесининъ учь талебеси Къуранны баштан сонъуна къадар эзберлеп, хафыз квалификациясыны къазандылар.
Дипломларны Къырым Муфтиси хаджы Эмирали Аблаев такъдим этти. О, Къырымда диний бильгининъ сакъланмасы, Къураннынъ огренильмеси ве диний тахсиль саасынынъ инкишафы чокъ муим олгъаныны къайд этти. Бундан гъайры, о, талебелерни окъуткъан оджаларына ве, бир шейге бакъмадан, бильгилерге ынтылгъан балаларгъа тешеккюрлер бильдирди. Айры миннетдарлыгъыны Муфти эфенди балаларгъа буюк дестек косьтерген ана-бабаларгъа бильдирди.
Бундан да гъайры, Муфти эфенди Ислям медениети, илими ве тахсилине дестек фондуна талебелернинъ мувафакъиетлерине къошкъан буюк иссеси ичюн тешеккюр бильдирди.
Эр бир мезунгъа дипломларнен берабер умреге бармакъ ичюн бирер сертификат эдие этильди.
Ихтар: хафыз – Къуранны эзберден огренген ве оны къорчалагъан кишидир. Къалай медресеси язда хафызлыкъ болюгине янъы талебелерни къабул этеджектир.
Къырым МДИ матбуат хызмети