Акъмесджитте парлакъ ве муим бир тедбир олып кечти – «Бир сеяренинъ балалары» инклюзив иджатнынъ больгелерара фестивали. Тедбир имкянлары фаркълы олгъан балаларны ве генчлерни бир арада топлап, оларнынъ истидатларыны ве иджадий чалышмаларыны косьтермек ичюн санагъа чыкъмакъ имкяныны такъдим этти.
Фестивальнинъ кечирилювине Къырым Джумхуриети ве Севастополь шеэри мусульманлары диний идареси янындаки Къырым мусульманлары хайрие фонду маддий дестек косьтерди. Муфтилигимизнинъ диний тедбирлерни тешкиль этюв болюгининъ рехбери Зенифе Аблаева эр кесни келеджек байрамларнен хайырлап, бу муим инклюзив мейданчыкънынъ къурулмасы ичюн тешкилятчыларына тешеккюр бильдирди.
«Тешкилятчыларгъа, балаларгъа истидатларыны аяткъа кечирмек, корюнмек ве эшитильмек имкяны берильгени ичюн, тешеккюр бильдиремиз. Бойле тедбирлер садедже бир байрам мерасими дегиль, олар дюньяны яхшы тарафкъа денъиштире, сынъырларны ёкъ эте ве балаларгъа озьлерине ишанч дуйгъусыны багъышлай», – деп, къайд этти Зенифе Аблаева.
Бунъа иляве оларакъ, Зенифе ханым «Вокал» номинациясынынъ гъалиплерини такъдирледи. Айрыджа, ишбу номинацияда «Лозовое махсус мектеп-интернат»-нынъ талебелери къайд этильди. Олар, музыка оджалары Анжела Булатованынъ рехберлигинде, «Мерхаметлик лялеси» хайрие акциясынынъ гимнини иджра этип, фестивальнинъ лауреатлары унваныны алдылар.
Концерт программасы толу ве меракълы кечти: иштиракчилер иджадий санат ишлерини нумайыш эттилер, музыкалы номерлерни ве театр саналаштырмаларыны косьтердилер. «Бир сеяренинъ балалары» фестивали косьтерди ки, иджатнынъ сынъырлары ёкъ, санат исе, инсанларны бирлештирген универсаль тильдир.
Къырым МДИ матбуат хызмети