Къырым Джумхуриети ве Севастополь шеэри мусульманлары диний идаресининъ (Таврия Муфтиятынынъ) аризасы иле региональ эмиетке малик медений мирас абиделери джедвелине эки янъы объект кирсетильди. Бойледже, Аутка коюнде ерлешкен эски джами бинасы (шимди Ялта шеэрининъ сынъырлары ичинде, Кирова сокъ., 113 адресинде) ве Багъчасарай районынынъ Гъавр коюнде ерлешкен тарихий «Ахмед ве Мехмед агъа-къардашнынъ эви» региональ эмиетке малик медений мирас объектлери олдылар.
«Къырым мусульманлары диний идареси Медений мирасны девлет тарафындан сакълав департаментине мунасип аризаларнен мураджаат этип, ишбу объектлернинъ абиделер джедвелине кирсетильмеси ве оларнынъ девлет тарафындан имае этилювинининъ теминленмеси риджасында булунды. Департамент, озь невбетинде, керекли процедураларны кечирип, шу объектлерни бирер абиде оларакъ таныды», – деп, къайд этти Къырым Муфтисининъ месуль кятиби Айдер Аджимамбетов.
Къырым мусульманлары диний идареси, Къырым Муфтиси хаджы Эмирали Аблаевнинъ ёлбашчылыгъында, Департаментнинъ ёлбашчыларына ве Къырым Джумхуриети Медениет назирлигининъ Медений мирас боюнджа ильмий-усулий шуранынъ азаларына оларнынъ профессионаллиги ве бойле абиделерге буюк меракъ косьтерювлери ичюн тешеккюр бильдире. Тарихнынъ ве кечмишимизнинъ сакъланылувы – ичтимаий аятымызнынъ муим къысымыдыр, бунынъ ичюн онъа айры эмиет бермек керек. Бизим улькемиз чешит абиделерге, шу джумледен, диний абиделерге гъает зенгиндир, бунынъ илериде ичюн даа чокъ ишимиз бар.
Ихтар: Аутка коюнинъ джамиси 19 асырда къурулгъан. Джами оюлгъан къавий ташлардан къаланып, эвель онынъ дёрт тарафлы тенекенен къапатылгъан дамы бар эди. Пенджерелери кемер шекилинде япылгъан эди. Кунюмизде джами бинасы музыка мектеби оларакъ къулланыла.
«Ахмед ве Мехмед агъа-къардашнынъ эви» Багъчасарай районындаки Гъавр (Плотинное) коюнде, Ленина сокъагъында ерлеше. Эвнинъ киришлеринде, эки тарафтан арап уруфатынен тарихлер язылы, гъарбий тарафтан – хиджрий 1202 сене, шаркъий тарафтан – хиджрий 1203 сенеси. Христиан такъвимине коре, бу – 1781 ве 1782 сенелери. Бунъа иляве оларакъ, киришлерде бойле язылар бар: шаркъ тарафында: «Машаллах, эльхамду лиллях. Саиби – Халим огълу Мехмед, 1203 сене», гъарп тарафында: «Машаллах, эльхамду лиллях. Саиби – Халим огълу Ахмед, 1202 сене».
Мезкюр эмирлернен ашагъыдаки багълантылар иле таныш олмакъ мумкюн:
https://mkult.rk.gov.ru/documents/00ec0600-a6d1-46e2-bdbe-e6d6f09456c7;
publication.pravo.gov.ru/document/9101202506300011.
Къырым МДИ матбуат хызмети