Къырым Джумхуриетининъ Курортлар ве туризм назирлигинде гид ве экскурсовод олгъан кишилернинъ агъымдкаки йылда сонъки аттестация сессиясы олып кечти. Йыл девамында бутюн ярымадамыздан мутехассыслар ресмий аккредитацияны алмакъ ниетинен лязим процедурадан кечмек ичюн аризаларыны бере эдилер.
Аттестациядан мувафакъиет иле кечкен мутехассыслар бельгиленген маршрутлар боюнджа, шу джумледен, мешхур сарайлар, Къырымнынъ «къоба шеэрлери» ве Акъяр шеэриндеки объектлер боюнджа экскурсияларны кечире билелер.
Аттестация комиссиясынынъ ишинде теркибине Къырым Джумхуриети ве Севастополь шеэри мусульманлары диний идаресининъ диний тедбирлерни тешкиль этюв болюгининъ рехбери Зенифе Аблаева иштирак этти.
Комиссиянынъ рехбери, Къырым Джумхуриети Курортлар ве туризм назирининъ муавини Аметхан Тынчеров бутюн комиссия азаларына семерели ортакъ иш ичюн тешеккюрини бильдирди. О, больгемизде туристик саанынъ инкишафы ве медений-тарихий асабалыгъымызнынъ сакъланылувы ичюн экскурсион кадрларнынъ ихтисас дереджесини арттырмакънынъ муимлигине ургъу япты.
Къырым МДИ матбуат хызмети