Къырым Джумхуриетинде бутюнкъырым «Мерхаметлик лялеси» хайрие акциясы тантаналы шекильде янъыдан башлатылды. Лейха Къырым Джумхуриетининъ Башлыгъы Сергей Аксёновнынъ дестегинен кечирилип, тахсиль ве мектептен алдын муэссиселерини, акимиет органларынынъ векиллерини, дин эрбапларыны ве ярымаданынъ лякъайт къалмагъан бутюн сакинлерини бирлештире.
Къырым Джумхуриети ве Севастополь шеэри мусульманлары диний идареси, адет узере, шу эйиликке озь иссесини къошмагъа истеген эр кеске – студентлерге, оджаларгъа, медениет эрбапларына, шеэрлернинъ ве районларнынъ мемуриетлерине, имамларгъа, джемаат тешкилятларына, мектеп талебелерине мураджаат эте. «Мерхаметлик лялеси» 5 йылдыр мерхаметликнинъ, дестекнинъ ве инсаниет бирдемлигининъ тимсалидир.
Якъын айлар ичинде бутюн иштиракчилер акциянынъ тимсали олгъан лялелерни кягъыттан, боюнджакълардан, къумачтан, сабундан ве дигер эльяпма мальземелерден япаджакълар. Баарьнинъ башында исе, азыр эльяпмалар Къырымнынъ чешит мейданларында такъдим этиледжек.
Къырым Муфтилиги «Мерхаметлик лялеси» акциясыны 2020-нджи сенесинден башлап, эр йыл кечире. Беш йыл ичинде шу акция джумхуриетимизнинъ муим хайрие арекетлерининъ бири олды. Акция «Балаларнынъ эллеринен, буюклернинъ эйи ниетинен» деген символик бир шиар астында кечириле. О, 2026-нджы сенесининъ апрель 30 кунюне къадар девам этеджек. Бундан да гъайры, акциянынъ «Хусусий Лозовое мектеп-интернатынынъ» балалары иджра эткенлери махсус гимни де бар.
Бойледже топлангъан паралар саесинде къыйын вазиетте къалгъан аилелерден онларджа балагъа ярдым этильди. Бунъа иляве оларакъ, бутюн джумхуриетимиз ичюн муим олгъан бир лейха олгъан Кефеде бала хосписининъ къурулышы ичюн 500 000 рубле топланылды. Былтыр ве бу сене топланылгъан бутюн паралар махсус арбий операция иштиракчилерининъ къоранталарына ве агъыр хаста балалар олгъан аилелерге дестек косьтермек ичюн ёлланыладжакъ. Ишбу къарар акциянынъ эсас манасыны ифаде эте – тамам шимди ярдымгъа мухтадж олгъанлар ичюн гъайретлеримизни бирлештирмек.
Хатырлатамыз, башында акция Къырым Муфтиси хаджы Эмирали Аблаев тешеббюсинен, агъыр хаста балаларны бакъып, аджеле ярдымгъа мухтадж олгъан ана-бабаларнынъ риджасынен тешкиль олунды. Энъ башындан онынъ макъсады – бутюн Къырым джемиетини мерхаметлик, къаршылыкълы ярдым ве хусусий дестекке мухтадж кимселерге месулиет дуйгъусы этрафында бирлештирмектир. Балалар иджады ве умумий иштирак саесинде акция косьтерди ки, саде корюнген шейлер биле умютнинъ ве керчек денъишмелернинъ менбасы ола биле.
«Мерхаметлик лялеси» девам этип, эйиликлерни арттыра ве хатырлата: бинълердже инсан мерхаметлик эсасында бирлешсе, кичкене ляле биле буюк умютнинъ тимсали ола биле.
Къырым МДИ матбуат хызмети