Къырым Джумхуриети ве Севастополь шеэри мусульманлары диний идаресини Къырымтатар академик музыкалы драма театрининъ эйети зиярет этти. Корюшюв медений ве маневий мунасебетлернинъ пекитилюви макъсадынен кечирильди.
Артистлерни Къырым Муфтиси хаджы Эмирали Аблаев ве Муфтиликнинъ диний тедбирлерни тешкиль этюв болюгининъ рехбери Зенифе Аблаева къаршыладылар. Мусафирлер ичюн экскурсия кечирильди, Муфти муавини Раим Гъафаров идаренинъ фаалиети ве джами къуруджылыгъынынъ тарихы акъкъында тариф этти.
Зияретнинъ энъ тантаналы къысымында артистлерге Къырым Муфтисинден тешеккюрнамелер такъдим этильди. Артистлер озьгюнлигимиз, медениетимиз, ана тилимиз ве аньанелеримизнинъ сакъланувына ёнелик умумий иджадий лейхаларнынъ омюрге кечирилювинде фааль иштирак эткенлери мунасебетинен такъдирлендилер.
«Диний идаренен медений муэссиселер арасындаки семерели ишбирлик миллий мирасымызнынъ сакъланылувында ве оны келеджек несиллерге етиштирилювинде эсасий роль ойнай», – деди Муфти эфенди.
Къырым МДИ матбуат хызмети