Etrafımızdaki barlıq, yaşağan dünyamıznıñ qurulması Yüce Rabbimizniñ mükemmel eserleridir ki, er künlik ayatımızda olarğa alışıp, tabiy kibi qabul etsek de, biraz terence tüşüngenimiznen, asılında aqılğa sığmaycaq ve atta bir tılsım derecesine yetken sanat olğanını añlamağa qıyın olmaz. Bir can içinde daa bir cannıñ aynı zamanda bulunması, yani bir vucut içinde daa bir vucutnıñ taşılması, östürilmesi ve soñra onı bir insan şeklinde dünyağa çıqarılması da eñ ayrette qaldırıcı mücizilerden biridir.
İnsan doğuvı aqqında bir sıra ayetler bellidir. “O ki, yaratqan er şeyni güzel yaptı. İnsannı yaratmağa da çamurdan başladı. Soñ onıñ nesilini, zayıf bir suvnıñ özünden yarattı. Soñ, onı şekillendirip, oña ruhundan üfledi. Siz içün qulaqlar, közler, yürekler yarattı! Ne qadar az şükür etmektesiñiz!” (Secde suresi 32 / 7-9 ayetler). Eñ meraqlısı şu ki, nice yıllar devamında bir sıra alimlerniñ usanmaz araştırma, tedqiqatları neticesinde keşf etilgen, tasvir olunğan yañı cannıñ dünya yüzüne kelme esnasları asırlar evel muqaddes kitabımızda tasvir etilgendir. İşte bu da mücize degilmi? “Ey, insanlar! Eger yañıdan tirilüvde şübelenseñiz, şunı biliñizki, biz sizni topraqtan, soñ nutfeden (sperma), soñra alaqa (“alâqa” qadınnıñ sperma tarafından aşlanğan ve rahimine yerleşken yımırtasıdır). Soñra yaratılışı belli-bellisiz, bir mudğadan (embrionnıñ üstünde tiş izlerini añdırğan, lâkin daa azaları pişkinleşmegen şekli demektir) yarattıq ki, sizge qudretimizni köstereyik. Ve istegenimizni belgilengen bir müddetke qadar rahimlerde bekletirmiz, soñ sizni bir sabiy olaraq tışarı çıqarırmız. Soñ küçlü çağıñızğa irişmeñiz içün sizni büyültirmiz” (Hac suresi 22\5 ayet).
Demek ki, insannıñ dünyağa kelüv mücizesini Allah qadın vastasınen numayış etmekte. Bu da büyük şereftir! Qıymetli yükni alğan qadın, yüregi altında canlanğan emanetini yolnıñ soñuna qadar yetkizmek, hayırlısınen qavuşmasına qadar bayağı zorluq çekse de, bu devir iç bir şeynen qıyaslanmaz hayır ve bereket, misalsiz eyecan ve teren duyğular ile zengin vaqıttır. Hamile qadınğa nisbeten etraftakilerniñ munasebeti de deñişe. Ağırayaqlılarğa ürmet ve diqqat kösterilmesi tabiydir. Böyle alda qadın özüni nasıl alıp barmalı, ne yapmalı, ne aşamalı, ne içmeli kibi suallerge zemane alimlerniñ tevsiyeleri çoq ve ögrenilmesi qolaydır. Peyğamberimiz (s.a.v.) hamile qadınlarnıñ vaziyetini hadislerde şu şekilde aña: “Qadın hamile vaqtında, doğum vaqtında, balanı emizdirgen devirde Allah yolunda cihat etkenler kibidir. Bu devirde can berse, şeitler arasına kirecektir” ( Taberani).
Resulüllah(s.a.v.) qadınlarnı sağlığına diqqat etmege çağıra ve soñ aylarda hurma aşamalarını tevsiye ete edi. Maneviy vaziyetine kelgende, musulman qadınğa bu devirde daa çoq dua oqumaq, hayır işlerde bulunmaq, beden ve fikir temizligine diqqat etmek, Allahnı çoqça zikr etmek ve Peyğamberimizge (s.a.v) salâvat ketirmek, mümkün olğanı qadar abdestli olmaq tevsiye etile. Zaten, ana ve yüregi altında büyügen bala arasında bağ ne qadar qaviy olğanı artıq şübe doğurmay. Bala terbiyesi qarnından başlanğanını köz ögüne alsaq, hamilelikniñ belli bir devirinden başlap, yani bala artıq ana sesini ayıra bilgen, yarıq, davuşlardan tesirlengen vaqıttan başlap qadın, küçük evlâdınen subetleşe bile, onı teselli ete, Allah sözüne alıştıra bile.
“Hidayet” gazetası, fevral 2016 s.