Къырым Джумхуриети ве Севастополь шеэри Муфтиси хаджы Эмирали Аблаевнинъ авалесинен Къырым Муфтиси муавинининъ Багъчасарай районындаки умумтахсиль мектеплеринен ишбирлик боюнджа ярдымджысы Аслан Алиев «Беслан. №1 мектеп» терроризм профилактикасы боюнджа халкъара меркезини зиярет этти. Зиярети эснасында о, Къырым мусульманлары диний идареси ве шахсен Къырым Джумхуриети ве Севастополь шеэри Муфтиси адындан ёлланылгъан мураджаатны теслим этти.
Мураджаатта, хусусан, бойле сёзлер бар: «Биз, къырымтатарлар, къардаш осетин халкъынынъ шу даянылмаз аджысына пайыдармыз. Бу фаджиа – умумий ясымыздыр».
Бундан да гъайры, Меркезнинъ адресине Къырым Муфтисининъ муавини Раим Гъафаровнынъ язгъаны, достлукъкъа ве бирдемликке чагъыргъан шиири тапшырылды. Муэллифнинъ сёзлерине коре, айны шу дуйгъулар кучюмизнинъ темели олып, эр тюрлю яманлыкънынъ къаршысыны алмалары мумкюн: «Барышыкълыкъ олсун, къан тёкюльмесин, Къардашлар, бизим бир Ватанымыз бар! Бирлик, къардашлыкъ ве севги эвимизни терроризмден къорчалар!»
Багъчасарай районындаки Азек (Плодовое) коюнинъ Сабадашев Е.М. адына орта умумтахсиль мектебининъ талебелери озь эллеринен япкъанлары бахшышларны – буюк беяз къуш шекилиндеки къандильни ве гогерджинлер шекилиндеки оригами япмаларыны ёлладылар. Кягъыт къанатлар устюнде балалар, биз, Русие ватандашларынынъ умумий маневий-ахлякъий къыйметлер эсасында тургъан бирлигимизнен кучьлю олгъанынымызны хатырлаткъан сёзлерни яздылар.
Зиярет Къырым мусульманларынынъ осетин халкъынен бирдем олгъаны косьтерди ве барышыкълыкъкъа, достлукъкъа ве бирликке ынтылувынынъ тимсали олды.
Къырым МДИ матбуат хызмети