Qırım Müftisiniñ Qırım Cumhuriyeti ve Sevastopol şeerinde ÜFSİN ile işbirlik boyunca yardımcısı, Aqmescitniñ baş imamı Muhammed İslamov şartlı olaraq mahküm etilgen semetdeşlerimiznen “İslâm – eyilik ve barışıqlıq dinidir” mevzusında dinimizniñ temelleri boyunca suhbet keçirdi. “Dindaşlarımız ile körüşüvlerde men daima İslâmnıñ ananeviy qıymetlerine urğu yapam, Muhammed Peyğamberimizniñ (s.a.s.) ayatından ibret almağa çağıram. Peyğamberimizniñ ayatında qıyın zamanlar da oldı, amma, o, böyle vaziyetlerde özüni nasıl alıp bardı? Onıñ ayat tarzı bizim içün nümünedir”, – dep, qayd etti Muhammed İslamov.
Suhbet devamında Muhammed İslamov İslâmnıñ ahlâq, eyilik ve barışıqlıq dini olğanına urğu yaptı. “İslâm – em musulmanlarnıñ öz ara, em de diger din vekillerinen aralarında güzel munasebetler qurğan dindir”, – dedi Müfti yardımcısı ve Qırım musulmanları diniy idaresiniñ maarif faaliyeti aqqında tarif etti.
Buña ilâve olaraq, Muhammed İslamov “Qırım Cumhuriyetinde ve Sevastopol şeerinde cezalarnı icra etüv federal idaresiniñ Cinaiy icra inspektsiyası hızmeti” federal devlet müessisesiniñ Aqmescit şeeriniñ Merkeziy rayonı ve Aqmescit rayonındaki filiallarınıñ hadimlerine intiharnıñ tehlikesi aqqında tarif etti.
“Qayd etmeli ki, iç bir dinde intihar alğışlanılmay. Bu dehşetli günah ep menfiy qarşılanmaqta. Ömür – Allah bergen emanettir. İnsan öz ömürini insanğa lâyıq şekilde yaşamağa tırışmalı. Ebet, er vaqıt yahşılıq olmay, problemalar ve qıyınlıqlar da ola bile, amma insan qısmetine razılıq köstermek, sabır etmek kerek, em de eyilik içün elinden kelgenini yapmağa tırışmaq kerek”, – dedi Muhammed İslamov.
Qırım MDİ matbuat hızmeti