Къырым Джумхуриети Ички ишлер назирлигининъ экстремизнен куреш меркези тарафындан кечирильген миллетлерара ве динлерара муаббетликнинъ къавийлешюви боюнджа девлет сиясетининъ омюрге кечирилюви черчивесинде «Нефрет ве душманлыкъкъа ёкъ деймиз!» маариф акциясы кечирильди. Тедбир Къырым джумхуриет китапханесинде, Къырым Джумхуриетининъ тахсиль, илим ве яшлар назирлиги иле аньаневий динлер векиллерининъ фааль иштиракинен олып кечти.
Акциянынъ программасынынъ эркянына умумтахсиль мектеплернинъ ве колледжлернинъ талебелери иле мезкюр экстремизмнен куреш меркезининъ хадимининъ, Къырым Муфтисининъ муавини Раим Гъафаровнынъ, Акъмесджит ве Къырым епархиясынынъ миссионерлик болюгининъ рехбери, протоиерей Максим Кондаковнынъ ачыкъ сухбети кечирильди. Аньаневий динлернинъ джемиетте барышыкълыкънынъ ве муаббетликнинъ сакъланылувындаки ролю, оларнынъ яшларнынъ маневий-ахлякъий тербиесиндеки иссеси музакере этильди.
«Нефрет ве душманлыкъ – гонъюль хасталыкъларыдыр. Бизим аньаневий къыйметлеримиз, православ, мусульман, я да дигер динлернинъ дегерлери янымыздакилерге севгиге, урьметке ве мерхаметликке эсаслана. Яшларнен диалог – бизим умумий вазифемиздир», – деп, къайд этти Къырым Муфтисининъ муавини Раим Гъафаров.
Акция яш несильде зорбалыкъ, экстремизм ве ксенофобия мефкурелерини къабул этмеювни ве улькемизнинъ тарихий ве медений фаркълылыгъына урьмет дуйгъусыны ашыламакъ макъсадынен кечирильди.
Къырым МДИ матбуат хызмети