Qırım Cumhuriyeti ve Sevastopol şeeri musulmanları diniy idaresinde “Novator” mesülieti sıñırlı cemiyetine elâllıq sertifikatı taqdim etildi. “Novator” şirketi “Azbuka Krıma” (“Qırım elifbesi”), “Milaya derevnâ” (“Güzel köy”), “Cankoyskoye moloko” (“Canköy sütü”), “Cankoyskiy sır” (“Canköy qaşqavalı”) ticariy markalarını temsil ete. İnsanlarnıñ eyiligi oğrunda muvafaqiyetli çalışmalar tilep, şirketniñ keyfiyet bölügi rehberi Svetlana Çinâyevağa vesiqanı Qırım Müftisiniñ muavini Ayder İsmailov taqdim etti.
“Novator” şirketi süt mahsulatlarını, – işlenmegen süt, sarı yağ, sığır, eçki ve qoy sütü, eritilgen ve irimçikli qaşqavallarnı, quru süt mahsulatlarını istihsal ete. Şu mahsulatlar endi “Elâl” işareti ile belgilenecek.
“Bizim şirketimiz Qırımda eñ büyüktir. Biz künde üç yüz tonnağace sütni işlep çıqamız. Sütniñ esas kölemini biz qıtadan ketiremiz. Sütni biz eyice teşkeremiz, o, laboratoriyamızda sıqı nezaretten keçirile. Biz bütün Qırımnı keyfiyetli ve lezzetli mahsulatnen temin etmege tırışamız. Er bir müşteri bizim içün qıymetlidir”, – dedi Svetalana Çinâyeva.
Bundan da ğayrı, “Novator” şirketi yarımadamıznıñ mektepten aldın ve umumtahsil oquv yurtları içün balalarğa qararlaştırılğan mahsulatlarnı teminley.
İhtar: Elâllıq sertifikatını almağa istegen iş adamları QMDİ “Elâl” sertifikatsiyası merkeziniñ başlığı Remzi Qurtdedege nevbetteki telefon boyunca muracaat ete bile: +7 978 074 18 47, ya da el.adres: halal@qmdi.ru
Qırım MDİ matbuat hızmeti