Mayısnıñ 18-nde Qırımnıñ bütün camilerinde qırımtatar halqınıñ sürgünlik qurbanları ruhlarını añmaq içün ananeviy dua merasimleri keçirildi.
Qırım musulmanlarınıñ diniy yetekçisi hacı Emirali Ablayev qayd etkeni kibi, sürgünlik – qırımtatar halqınıñ tarihında qara saifedir, ve bu vaqia yüreklerimizden asıl da silinmeycek.
“Biz daima Allahqa keçmişlerimizniñ canları raatlığını tapsın dep dua etecekmiz. Ana-babalarımız qorqunç künlerni ve yıllarnı yaşadı. Biz bunı hatırımızda tutıp, halqımıznıñ hayırı ve inkişafı içün, umumiy refah içün adım-adım daa güzel ömürni qurmaq kerekmiz. Böyle cinayetler iç bir vaqıt ve iç bir yerde tekrarlanmasın”, – dedi Qırım Müftisi.
Adet üzre, qırımtatar halqınen birdemligini kösterip, Sürgünlik qurbanlarını hatırlav kününde Qırımdaki bütün dinlerniñ vekilleri de öz mabedlerinde dua merasimlerini keçirdiler.
Qırım MDİ matbuat hızmeti