Qırım Cumhuriyeti ve Sevastopol şeeri Müftisi hacı Emirali Ablayevniñ Rusiye künü ile hayırlavı:
“Aziz dostlar, ürmetli semetdeşler! Sizni can-yürekten devlet bayramı – Rusiye künü ile hayırlayım. Bu künde biz biñ yıllıq tarihqa ve unikal mirasqa saip ülkemizni, bir çoq halq ve medeniyetni azaları teñ uquqlı bir qoranta içinde birleştirgen Vatanımıznı şereflendirip alğışlaymız. Devletimizniñ ululuğı ve qudreti eybetlidir, büyük ürmetke lâyıqtır. Er bir vatandaşımıznıñ yüreginde Vatanımızğa sevgi yaşasın. Ecdatlarımıznıñ küçlü irade nümünesi inkişafnıñ ve eyi alımıznıñ temeli olsun, büyük naaliyetlerge siltem bersin ve güzel kelecegimizge işanç ile baqmağa yardım etsin. Rusiye toprağınıñ cümertligi er bir qorantağa bolluq, raatlıq, tınçlıq ve aenklik ketirsin! Epimizge baht ve amanlıq tileyim!
Yüce Yaratıcımızğa dua etip, bizge er bir saada muvafaqiyetlerge irişmek içün küç ve yañı güzel ğayelerni bermesini niyaz etemiz”.
Qırım MDİ matbuat hızmeti