Qırım Cumhuriyeti ve Sevastopol şeeri musulmanları diniy idaresiniñ “Elâl” sertifikatsiya merkeziniñ başlığı Remzi Qurtdede Aluştada keçirilgen Finn-ugor halqları medeniyetleriniñ V festivalinde iştirak etti. Tedbir çerçivesinde “Milletler birleşmesiniñ birleştirici faktorı olaraq medeniyet” mevzusında tögerek masa keçirildi. Remzi Qurtdede festival iştirakçilerini Qırım Müftisi hacı Emirali Ablayev adından selâmlap, farqlı din vekilleriniñ iştiraki ile beraberce tedbirler keçirilüviniñ müimligini ayrıca qayd etti. “Halq adetleri, çoqmilletli devletimizniñ ananeleri halqlarnı birleştirmege, dostane munasebetlerniñ qurulmasına yardım ete”, – dep, qayd etti Remzi Qurtdede.
Festivalde Mordoviya Cumhuriyetinden kelgen eyet iştirak etti, onıñ terkibine Saransk şeer memuriyetiniñ, Mordoviya Cumhuriyetiniñ Medeniyet, milliy siyaset ve arhiv işleri boyunca nazirliginiñ ve mordva (mokşa ve erzâ) halqınıñ bölgelerara cemaat teşkilâtınıñ vekilleri kirdiler.
Qırım MDİ matbuat hızmeti
Foto: Milletlerara munasebetler boyunca devlet komitetiniñ matbuat hızmeti