Qırımtatar medeniy tarihiy mirası müzeyinde halq ressamı ve şair, doğma üskütli Sadıh Aciselimovnıñ hatıra aqşamı keçirildi. Tedbir esnasında Kebir caminiñ imamı İsmail Ablayev şu semetdeşimizniñ hatırasına dua oqudı.
Toplanğanlarnı müzey müdiriniñ muavini Nuriye Gemici selâmladı. O, Sadıq Aciselimov icadınıñ müimligi ve onıñ Qırımnıñ tarihiy keçmişi saqlanıluvına qoşqan issesini qayd etti, soy-sopuna ve müzey musafirlerine kelgenleri içün teşekkür bildirdi.
Ressam aqqında hatıralarınen ressam Ali Bekirov, Qırım Cumhuriyetinde nam qazanğan artist Rustem Memetov, “Namus” cemaat teşkilâtınıñ vekili Timur Çelebiyev, torunı Gülnara Osmanova ve qızı Mümine Murahas paylaştılar.
Tedbir devamında Sadıq Aciselimovnıñ ayatı ve faaliyetini añlatqan fotoresimler numayış etildi. Rustem Memetov halq yırlarını icra etti.
Qırım MDİ matbuat hızmeti, Qırımtatar medeniy tarihiy miras müzeyi saytınıñ malümatına esaslanaraq.