Qırım Cumhuriyeti ve Sevastopol şeeri Müftisi hacı Emirali Ablayevniñ avalesi ile suv basqını neticesinde evi suv tübünde qalğan Adile Temirkayayevağa yardım kösterildi. Keçken raatlıq künleri Qırım Müftisiniñ muavini Raim Ğafarov Aqmescit rayonınıñ Temir Ağa (Sovhoznoye) köyüne barıp, suvğa batqan evni közden keçirdi.
“Zarar körgen Adile hanım qıyın vaziyetke tüşti. Onıñ evi suv tübünde qaldı, kreditke alınğan mebel ve tehnika qullanımsız alğa keldi. Biz çette qalıp olamayıq. Adile hanım öz başına 8 yaşındaki oğlunı östüre, o, yardımğa muhtac”, – dedi Raim Ğafarov.
Qayd etmeli ki, şimdi qurtarıcılar ve kommunal hızmetniñ hadimleri suv basqınınıñ zararlarını ortadan yoq ete. Bundan da ğayrı, suv basqınından kelgen zarar esaplanmaqta.
Qırım MDİ matbuat hızmeti