Qırım Cumhuriyeti ve Sevastopol şeeri musulmanları diniy idaresiniñ konferentsiya zalında Müfti hacı Emirali Ablayevniñ qırımtatar cemaat faaliyetçileri, belediye hadimleri ve halq vekilleri ile körüşüvi olıp keçti. Suhbet devamında yaş nesilniñ maneviy-ahlâqiy terbiyesi, urf-adetniñ ve medeniy mirasnıñ saqlanuvı boyunca meseleler muzakere etildi. Bundan da ğayrı, Cemaatçılıq Palatasınıñ reisi Aleksandr Formançuk yolbaşçılığında mezkür şuranıñ vekilleri ile körüşüv esnasında cemaat faaliyetçilerinden ibaret teşebbüsçiler taqımı tarafından köterilgen meseleler seslendirildi. Bugün qırımtatar cemaatçılığını raatsızlağan müim bir mesele – qırımtatar tiliniñ devlet tili olaraq qullanıluvını temin etecek qanunlarnıñ qabul etilüvidir. Körüşüv devamında qırımtatarlarnıñ Qırımnıñ içtimaiy-siyasiy ayatında iştiraki, Qırımnıñ tarihiy toponimikasınıñ ğayrıdan tiklenüvi, HV-XVI asırlarğa ait mimari ve medeniyet yadikârlığı olğan Qalğa Sultan sarayı külliyesi toprağında qurucılıq işleriniñ keçirilüvi ve Qırımnıñ umumtahsil müessiselerine Sovetler Birligi qaramanlarınıñ ve Ulu Vatan cenki generallarınıñ adları berilüvi meseleleri muzakere etildi.
Qırım Müftisi hacı Emirali Ablayev qırımtatar faaliyetçilerine halqnıñ ümütlerine lâqayd qalmayuvları sebebinden minnetdarlığını bildirdi ve meselelerni işbirlikte çezmege tırışıp, cemiyetniñ eyiligi içün çalışmağa azır olğanını bildirdi.
Qırım MDİ matbuat hızmeti
Telegramm kanalına abune oluñız – https://t.me/qmdi_org