Qırım Cumhuriyeti ve Sevastopol şeeri musulmanları diniy idaresinde qadın din ocalarınıñ toplaşuvı olıp keçti. Toplaşuv Qırım musulmanları diniy yetekçisi hacı Emirali Ablayevniñ rehberliginde olıp keçti. Qırım Müftisi öz çıqışında bilgi almaqnıñ ve er taraflı maarifniñ müimligine urğu yaptı. “İnsanlarnen çalışqanda, olarğa er taraflama inkişaf etmege yardım etmek ğayet müimdir. Bunı yapmaq içün özüñiz de oqumaq kereksiñiz. Em diniy maarifke, em de milliy urf-adetimizge diqqat ayırmalı”, – dep, qayd etti hacı Emirali Ablayev.
Bundan da ğayrı, Qırım Müftisi toplanğanlarnıñ diqqatını koronavirus infektsiyasınıñ profilaktikası boyunca tedbirlerniñ keçirilüvine çekti ve ağımdaki iş meselelerini muzakere etti.
Toplaşuvnıñ soñunda Qırım Müftisiniñ muavini Raim Ğafarov “Allahnıñ razılığını qazanmaq” mevzusında suhbet yaptı.
Qırım MDİ matbuat hızmeti