Qırım Cumhuriyeti ve Sevastopol şeeri musulmanları diniy idaresiniñ “Faydalı ilim” oqutuv-maarif merkezinde tikiş kursunıñ neticeleri çıqarıldı.
Tikiş kursunıñ 18 talebesi urbalarnıñ biçilmesi, tikişi ve tasarlanması boyunca temel bilgilerni menimsediler.
Bayram tedbirinde iştirakçiler işlerini numayış etti.
Kurs üç yarım ay devam etti. Bu vaqıt devamında qızlar temel bilgilerni alıp, qadın ve bala urbalarını tikmege ögrendiler. Tahsil planına esasen, kurs devamında er bir talebe birer etek, anter, bluza, ştan ve picak/palto tasarlap tikmek kerek edi. Büyütyun talebeler bu vazifeni becerdiler.
Kurs mezunlarını “Faydalı ilim” oqutuv-maarif merkeziniñ tahsil işleri rehberi Safiye Qurtdede ve kurs ocası Leylâ Seitmemetova hayırladılar. Olar kurs talebelerine bilgilerini mükemmelleştirmekni ve olarnı faydanen qullanmaqnı tilediler.
“Musulman qadını universaldir. O, ana, ev bikesi, qadın, çalışqan insan, aşçı, animatordır. Onıñ yapqan işleri ve bilgileri aqqında çoq aytmaq mümkün. Bizim tikiş kurslarımız sayesinde qadınlarnıñ olarğa fayda berecek ünerleri arttı”, – dep, qayd etti teşkilâtçılar.
Tedbir devamında mezunlar tikiş kurslarını yekünlegenleri aqqında sertifikatlar aldılar.
Hatırlatamız, “Faydalı ilim” oqutuv-maarif merkezinde tikiş kursları er üç ayda bir başlatıla. Nevbetteki taqım 2021 senesi, iyül 1 künü oqup başlaycaq.
Qırım MDİ matbuat hızmeti
