Qırım Cumhuriyeti ve Sevastopol şeeri musulmanları diniy idaresinde Qırım Müftisi hacı Emirali Ablayev “Rus hayalı” cemiyeti erkânında birleşken Moskva elitasınıñ temsilcilerinen körüşti. Qırım Müftiliginiñ musafirleri arasında yazıcı, İzbor klubunıñ rehberi Aleksandr Prohanov, şair, publitsist, edebiyat tenqidçisi, Rusiye yazıcıları birliginiñ kâtibi Mihail Kildâşov, İzbor klubu başlığınıñ birinci muavini, iş adamı Oleg Rozanov, siyasetşınas, jurnalist, cemaat faaliyetçisi, Geosiyasiy ekspertiza merkeziniñ başlığı Valeriy Korovin oldılar.
Çıqış etkenler devlet mefküresi, birlik, maneviy qıymetler aqqında suhbet ettiler. “Bizim esas maqsadımız – yaş nesilge öyle terbiye bermek ki, kelecek nesiller bizge minnetdar olsun. Bizim hata yapmaq aqqımız yoq. Bugün Qırımda bütün dinler mensüpleriniñ ğayreti sayesinde diniy mevzuda çatışmalar yoq. Biz eminliknen ögge ketemiz”, – dedi Qırım ve Sevastopol Müftisi haci Emirali Ablayev.
Körüşüv devamında QMDİ tedbirlerni teşkil etüv bölüginiñ rehberi Zenife Ablayeva Kebir cami boyunca ekskursiyanı keçirdi ve caminiñ tarihiy qıymeti aqqında tarif etti.
Qırım MDİ matbuat hızmeti