Qırım Cumhuriyeti ve Sevastopol şeeri musulmanları diniy idaresinde, Qırım Müftisi hacı Emirali Ablayevniñ rehberliginde bölge baş imamlarınıñ er aylıq toplaşuvı olıp keçti. Qırım musulmanlarınıñ diniy yetekçisi ayrı diqqatnı musulmanlarnıñ baş bayramlarından biri Qurban bayramınıñ qayd etilüvine ayırdı. Bu sene dünya musulmanları bayramnı iyül 9-12 künleri qayd etecek.
“Yaqında biz Qurban bayramını qayd etecekmiz. Yarımadamıznıñ köy, qasaba ve şeerlerinde evelden azırlıq körmek kerek. Bütün musulmanlar, esasen, muhtac din qardaşlarımız bayram ve birlik müitini duymalı”, – dep, qayd etti hacı Emirali Ablayev.
Körüşüv devamında din hadimleri ağımdaki iş meselelerni, şu cümleden, musulmanlarnı hacılıqqa yollamaq meselesini muzakere ettiler.
Toplaşuvnıñ soñunda bölge imamları bölgelerde musulmanlar arasında darqatmaq içün Qırım MDİ “Hidayet” gazetasınıñ yañı sanını aldılar.
Qırım MDİ matbuat hızmeti