Qırım Cumhuriyeti ve Sevastopol şeeri musulmanları Müftisiniñ muavini Esadullah Bairov ve Kezlev bölgesiniñ baş imamı Eskender Memetov Mahaçkala şeerinde diniy merkezniñ qurucılıq meydanını ziyaret etip, divarlarınıñ ilk taşlarını qoyuv merasiminde iştirak ettiler. Ondan da ğayrı, “Urf-adetniñ saqlanıluvında diniy ve aileviy qıymetler: bugünki zorluqlar ve kelecek içün çezüv yolları” mevzusında keçirilgen halqara konferentsiya iştirakçileriniñ eyyeti qurulayatqan merkezniñ saasında birlikte üyle namazını qıldı.
Qayd etmek kerek ki, mezkür merkezniñ qurucılıq endi üç seneden berli devam ete. Dağıstan halqı şu hayır işke aveslik ile para bağışlay. Minarelerniñ yüksekligi 47 metrni teşkil etecek ve camide Dağıstandaki 14 halqnıñ vekilleri olğan imamlar hızmette bulunacaq. Diniy mezkez 50 biñ kişige qararlaştırılğan. Merkezniñ saasında Dağıstan musulmanları diniy idaresiniñ idariy külliyesi yerleşecek. Ondan da ğayrı, şu yerde yolcularnı qabul etmek içün ev, park ve bala meydançığı qurulacaq. Bunen bir sırada, merkezde kitaphane ve müzeyniñ olması planlaştırıla.
Qırım MDİ matbuat hızmeti