Seyitler rayonınıñ baş imamı Rustem Temirov rayon dinlerara şurası azalarınıñ oturışında iştirak etti. Muşavere devamında içki işler nazirliginiñ ve Seyitler rayonı memuriyetiniñ medeniyet bölüginiñ hadimleri, ortodoks kilisesi ile yunan ve ermeni cemaatçılığınıñ vekilleri çıqışta bulundılar.
Rustem Temirov camilerniñ qurucılığı içün topraqlarını resmiyleştirüv qaideleri ve musulman din cemiyetleriniñ resmiy qaydqa alınuv cereyanı aqqında tarif etti. Qayd etmeli ki, Qırım Cumhuriyeti ve Sevastopol şeeri musulmanları diniy idaresi (Tavriya Müftiligi) şeerler, qasabalar ve köylerniñ içtimaiy ayatında faal iştirak ete. Mesâlâ, Rustem Temirov Seyitler rayonınıñ Cemaatçılıq şurasınıñ azasıdır. Onıñ muracaatı ile Büyük Eşkene (Kostoçkovka) köyüniñ mezarlığına avtomobil yolu olmağanı meselesi köterilip çezildi. İşbu yol ağımki sene, küzde yapılacaq.
Qırım MDİ matbuat hızmeti