Къырым ве Севастополь Муфтисининъ муавини Раим Гъафаров Акъмесджиттеки Росгвардиянынъ болюгини зиярет этти. Зиярет эснасында, о, арбийлернинъ тантаналы ант этюв мерасиминде иштирак этип, аскерлернен ихтисасларыны къазанмалары ичюн муим анъларында берабер олды.
Корюшюв девамында о, эрлер такъымы ичюн «Къардашлыкъ» ве «Ватангъа хызмет» мевзуларында эки лекция берди. Озь чыкъышында Раим Гъафаров арбий къардашлыкънынъ маневий тарафыны, ярдымлашув ве вазифеге садыкъ олув мевзуларыны ачыкълап, арбий хызмет эснасында бирлик ве Ватангъа севгининъ муимлигине ургъу япты.
Росгвардиянынъ хадимлери мундериджели сухбет ве маневий дестек ичюн тешеккюрлерини бильдирдилер. Бойле корюшювлер арбийлер рухунынъ пекинмесине ве больгеде динлерара диалогнынъ инкишаф этмесине сильтем бере.
Къырым МДИ матбуат хызмети