Qırım Cumhuriyeti ve Sevastopol şeeri Müftisiniñ muavini Raim Ğafarov tibbiyet hadimleriniñ zenaat kününe bağışlanğan tantanalı merasimde iştirak etti. Tedbir Qırım Cumhuriyetiniñ Devlet akademik muzıkalı teatrında olıp keçti.
Selâmlav sözlerinde Raim Ğafarov tibbiyet hadimlerini Qırım Müftisi hacı Emirali Ablayev adından zenaat künlerinen hayırladı.
“Quran-ı Kerimde buyurıla ki, bir insannı qurtarğan insan, sanki bütün insanlıqnı qurtarğan kibidir. Ürmetli tibbiyet hadimleri, siz insanlarnıñ ömürini hastalıqlardan ve viruslardan qurtarğan qaramanlarsıñız. Siz ömürniñ eñ büyük qıymeti olğan sağlıqnı qorçalaysıñız. Bunıñ içün sizge büyük minnetdarlığımıznı bildiremiz. Qıyın işleriñizde muvafaqiyetler ve minnetdar hastalarnı tileymiz”, – dedi Raim Ğafarov.
Soñra Raim Ğafarov Qırım Cumhuriyeti ve Sevastopol şeeri Müftisi hacı Emirali Ablayev adından Qırım Cumhuriyeti devlet bücet sağlıq müessisesi “Sürgün olunğan halqlarğa hızmet etici konsultativ-diagnostik merkeziniñ” baş ekimi, Ukrainada ve Qırım Cumhuriyetinde nam qazanğan ekim Liliya Mustafayevağa ve Qırım Cumhuriyeti devlet bücet sağlıq müessisesi “Qırım cumhuriyet qaza tibbiyeti ve acele yardım merkezi” nezaret hızmetiniñ rehberi Anna Sosnenkoğa teşekkürnameler taqdim etti.
Bundan da ğayrı, tedbirde Qırım Cumhuriyetiniñ Reisi Sergey Aksönov, Rusiye Federatsiyası Prezidentiniñ Cenübiy Federal Bölgedeki mesül temsilcisiniñ yardımcısı Kirill Stepanov, Qırım Cumhuriyeti Devlet Şurası Başlığınıñ birinci muavini Yefim Fiks, Qırım Cumhuriyeti Sağlıq naziri vazifesini vaqıtınca eda etken Konstantin Skorupskiy, Melitopol tibbiyet hadimleri ve digerleri iştirak ettiler.
Qırım MDİ matbuat hızmeti