Москвада, Федерация Шурасында Русие хадж миссиясынынъ топлашувы олып кечти. Топлашувда Русие Акимиетининъ, Президент Мемуриетининъ, диний идарелернинъ ве хадж операторларынынъ векиллери иштирак эттилер.
Къырым Джумхуриетини мушавереде Къырым Муфтисининъ муавини, Къырым Джумхуриети ве Севастополь шеэри мусульманлыр диний идаресининъ «АВН ТУР» ресмий хадж операторынынъ рехбери Артур Решитов темсиль этти.
Къырым Муфтиси хаджы Эмирали Аблаев адындан Артур Решитов бутюн назирликлерге ве идарелерге, эм де Русие хадж миссиясына Къырым мусульманларынынъ Меккеге ве Мединеге барып кельмесине дестек косьтергенлери ичюн тешеккюрлер бильдирди.
Мушавереде хаджылыкъ операторлары 2025 сенеси хадж мевсимининъ мувафакъиетнен кечирильгени аккъында эсабат бердилер. Русие хадж миссиясы Саудие Арабистаны Мемлекетининъ Хадж ве умре назирлиги тарафындан такъдим этильген 2026 сенеси хаджнынъ план джедвели боюнджа малюмат берди. 2026 сенеси хаджылыкъкъа бармакъ истегенлер 2026 сенеси, февраль 8-ге къадар весикъаларыны теслим этмелери керек. Визалар анджакъ 2026 сене, март 21-ге къадар бериледжек.
Бойледже, Саудие Арабистаны хаджылыкъны тешкиль этюв муддетини бир айгъа къыскъартты, кечкен йыллары исе, бу муддет он кунни тешкиль эте эди. Хаджылыкъкъа бармакъ истегенлер 2025 сенесининъ июль айындан башлап, весикъаларыны теслим эте билелер.
2026 сене хаджылыкъкъа бармакъ истегенлер невбеттеки весикъаларны теслим этмек кереклер:
– ички паспорт + къайд язысы (прописка);
– тыш паспорт, янъы биометрик сою, 10 йыллыкъ;
– фото
Малюмат ичюн телефонлар:
8 800 551 31 30
+7 978 09 08 202
+7 985 888 90 80
Къырым МДИ матбуат хызмети