Къырым Муфтиси хаджы Эмирали Аблаев ве Къырым мусульманлары диний идареси (Таврия Муфтияты) Сакъ районынынъ Къудайгъул (Воробьёво) коюнинъ имамы Сеитаджиев Энвер Заитовичнинъ вефаты мунасебетинен къорантасына, якъынларына ве чокъ йыллар девамында хызмет эткени джемаатына ичтен самимий тазиелерини бильдирелер.
«Юдже Раббимиз эр биримизге къыйын имтианны – юрегимизнинъ парчасы олгъан якъынларымызны гъайып этмекни такъдир этти. Бу аджыгъа даянмакъ ичюн сабыр ве Аллахкъа ишанч керек. Биз де аджы дуямыз, кедерленемиз ве Юдже Раббимизнинъ вефат эткен Энвер агъамызнынъ джанына рахмет этмеси ве ахиретте энъ гузель мукяфатларнен такъдир этмеси ичюн дуа этемиз!» – деди Къырым Муфтиси.
Аллах рахмет эйлесин!
«Шубесиз, биз Аллахнынъ къулларымыз ве, шубесиз, Онъа къайтаджакъмыз!» («Бакъара» суреси, 2/156).
Къырым МДИ матбуат хызмети