Къырым Джумхуриетинде Шефикъа Гаспринская адына II Бутюнрусие къадын къурултайы олып кечти, тедбир бутюн Русиеден фааль мусульман къадынларыны бир арада топлады.
Къурултайнынъ мевзусы – «Ислям медениети: Русие мусульманларынынъ миллий ве диний кимлиги». Тедбир черчивесинде иштиракчилер мусульман къадынларынынъ акълары, эмансипация, чыкъкъан янъы мушкюллер ве диний маариф иле мусульман къадын-къызларынынъ миллий образлары вастасынен медений озьгюнликни сакъламакънен багълы проблемаларны чезюв ёллары киби актуаль меселелерни музакере эттилер.
Къурултай иштиракчилерини Къырым Муфтиси хаджы Эмирали Аблаев селямлады. О, артыкъ экинджи йылдыр кечирильген бойле кениш микъяслы тедбирнинъ муимлигини къайд этти.
«Бу къурултай мусульман къадынларынынъ акълары ве джемиеттеки ери акъкъында бир сыра актуаль меселелернинъ чезилюви ичюн муим бир мейдан олды. Коремиз ки, къадынларымыз Ислям медениетининъ сакъланылувы ве даркъатылувында, эм де, яш несильнинъ маневий тербиесинде муим роль ойнайлар. Бойле тедбирлер къадынларнынъ бирлешмеси ве джемиеттеки ерининъ пекитилювине ярдым эте», – деди Муфти эфенди.
Къурултайнынъ умумий къысымында Къырым Джумхуриетининъ Башлыгъы адындан селямлав сёзлеринен «Рус бирлиги» больгелерара джемаат тешкилятынынъ незарет шурасы реиси Елена Аксёнова чыкъышта булунды. О, иштиракчилерге семерели чалышмалар тиледи. Бундан да гъайры, селямлав сёзлеринен ве марузасынен РФ Президенти Мемуриетининъ РФ Президентининъ ички сиясет идаресинде меслеатчы олгъан профессор Юлия Гусева чыкъышта булунды. Сёзге чыкъкъанлар арасында фаркълы девлет ве джемаат тешкилятларынынъ азалары, шу джумледен, Къырым Джумхуриети Девлет Шурасынынъ халкъ векили, Къырым Джумхуриети Девлет Шурасы медениет, медений асабалыгъынынъ сакъланувы ве спорт комитетининъ реиси Алла Пономаренко ве Къырым Джумхуриети Миллетлерара мунасебетлер боюнджа девлет комитети реисининъ биринджи муавини Вера Паутова иштирак этти.
Къурултай эки къысымдан ибарет олды. Биринджи къысым Ислям медениетинде миллий кимлик шекилленмесининъ тарихий аспектлерине багъышланды, экинджи къысымда исе, ичтимаий хызмет саасында мусульман къадын-къызлар бирлешмелерининъ ве тешкилятларынынъ теджрибесине айырылды. Иштиракчилер 1917 сенесинде мусульман къадын-къызлар арекети акъкъында ильмий марузаларынен чыкъышта булундылар ве земаневий къадын бирлешмелерининъ ишини музакере эттилер.
Идаремизнинъ диний тедбирлерни тешкиль этюв болюгининъ рехбери Зенифе Аблаева къурултайнынъ нетиджелерини чыкъарып, Фонднынъ рехберлерине яшларнынъ маневий-ахлякъий ве ватанпервер тербиеленюви ичюн япылгъан медений-маариф тешеббюслерге ве лейхаларгъа къол туткъанлары ичюн, тешеккюрлер бильдирди.
«Къадынлар къурултайы Русие мусульманлары арасында къадынлар арекетининъ инкишафына ёнелик муим бир адым олды. Биз тек тарихий меселелерни дегиль де, земанемизнинъ къадынларнынъ огюне чыкъаргъаны мушкюллерни музакере эттик. Муими шу ки, бизим тешеббюслеримиз конкрет проблемаларнынъ чезилювине ве къадынларнынъ озьлерини исбат этмелери ве фааль ичтимаий аят кечирмелери ичюн дестек алмаларына ёнелик олсун», – деди Зенифе Аблаева.
Къурултай Къырым Джумхуриети ве Севастополь шеэри мусульманлары диний идареси (Таврия Муфтияты) тарафындан, Ислям медениети, илими ве тахсилине дестек фонду ярдымынен тешкиль этильди.
Къурултайнынъ экинджи къысымы Багъчасарайнынъ тарихий ерлерине экскурсияларнен кечирильди. Къурултай мусафирлери Ханлар сарайыны, Зынджырлы медресени ве Сюйрен турагъында ерлешкен «Къырым халкъларынынъ гъайрыдан тикленюв ёлу» хатыра куллиесини зиярет эттилер.
Къырым МДИ матбуат хызмети