Къырым медениет, санат ве туризм университетинде «Шерит алтында» иман»: МАО зонасында маневий хызметнинъ теджрибеси» мевзусында «ачыкъ диалог» шекилинде музакере мейданы къурулды. Къырым Джумхуриетининъ студентлеринен бирликте музакере мейданыны фаркълы динлернинъ векиллери кечирди.
Корюшюв джебеде диний хызметининъ призмасындан бакъып, яшлар арасында миллетлерара ве динлерара мунасебетлернинъ эйилешмеси меселесине багъышланды. Фаркълы динлернинъ темсильджилери не ичюн даимий шекильде джебеге барып кельгенлерини анълаттылар.
Къырым Джумхуриети ве Севастополь шеэри мусульманлары диний идаресинден Къырым Муфтисининъ муавини Раим Гъафаров чыкъышта булунды. О, диний идаремизнинъ МАО иштиракчилерине ве оларнынъ къоранталарына косьтерген ярдымлары акъкъында тариф этти, бирлик олмакънынъ эмиетини къайд этти ве миллетчиликтен сакъындырды.
«Ватанны севмек – диндендир. Эпимиз бир гемиде олгъанымызны анъламакъ пек муимдир. Биримиз шу гемимизни тешсе, эпимиз батаджакъмыз. Бизим девлетимиз, МАО иштиракчилери, бизим къараманларымыз пек агъыр юкни устюне алдылар. Амма, бири юкленгенде, биз де омузымызны къойып, оларгъа ярдым этмек мумкюнмиз. Ватанперверлик будыр. Девлетимизнинъ кучю бирликтедир», – деп, къайд этти Раим Гъафаров.
Бутюн иштиракчилер арбийлерге маневий дестекнинъ муимлиги фикиринде бирлештилер.
Къырым МДИ матбуат хызмети