Къазанда Татарларнынъ миллий къурултайы олып кечти. Тедбирде Къырым Джумхуриети ве Севастополь шеэри мусульманлары диний идаресининъ темсильджилери иштирак эттилер. Къурултай «Татарстан – маневий ватанымыз» шиары астында кечирильди.
Ишбу къурултай земанемиз кетирген сынавлар къаршысында татар халкъынынъ такъдирине тесир эткен актуаль проблемаларнынъ ве меселелернинъ музакереси ичюн муим бир мейдан олды. Онда дюньянынъ эр бир тарафындан кельген татар диаспорасынынъ энъ мешхур ве тесирли векиллери иштирак эттилер.
Къырым Муфтисининъ муавини Раим Гъафаров къырымтатар мусульман джемиетини темсиль этип, татар халкъынынъ медений ве маневий асабалыгъына аит актуаль меселелер боюнджа музакерелерде фааль иштирак этти.
Миллий къурултай черчивесинде бир сыра тедбирлернинъ кечирилюви планлаштырылды, хусусан, Татар къадынларынынъ умумиттифакъ форумы, Татар яшларынынъ умумиттифакъ форумы ве Русиедеки татар больгесининъ тарихыны огренген тедкъикъатчыларнынъ корюшюви.
Къырым МДИ матбуат хызмети