Qırım Müftisiniñ Qırım Cumhuriyeti ve Sevastopol şeerinde UFSİN ile işbirlik boyunca yardımcısı, Aqmescitniñ baş imamı Muhammed İslamov 2019-2023 senelerinde Rusiye Federatsiyasında terrorizm mefküresiniñ qarşısını almaq kompleks planınıñ amelge keçirilmesi boyunca iş muşaveresinde iştirak etti. Tedbir Qırım Cumhuriyetiniñ Milletlerara munasebetler boyunca devlet komitetinde olıp keçti.
Muhammed İslamov öz çıqışında Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatınıñ) terrorizm mefküresine qarşı alıp barğan işi aqqında tarif etti. “Biz er daim ealige diniy malümatnı ananeviy menbalardan almağa, Diniy idaremiz tarafından neşir ya da tasdiq etilgen edebiyatnı qullanmağa tevsiye etemiz. Tahkiqat izolâtorında ve koloniyalarda bayramlar keçiremiz, kitaphanelerine kitaplar taqdim etemiz. Tedbirlerni tek mahkümlernen degil de, mezkür müessiselerniñ hadimleriniñ iştirakinen keçiremiz”, – dep, qayd etti Qırım musulmanları yetekçisiniñ yardımcısı. Bundan da ğayrı, Muhammed İslamov bütün tedbirlerniñ keçirilüvine destek köstergeni içün Qırım Cumhuriyeti ve Sevastopol şeerinde UFSİN-niñ rehberligine teşekkür bildirdi.
Devlet komitetiniñ başlığı Ayder Tippanıñ rehberliginde keçken tedbirde Qırım Cumhuriyeti ve Sevastopol şeerinde cezalarnı icra federal hızmetiniñ, Qırım Cumhuriyetinde Antiterror komissiyası apparatınıñ, Qırım Cumhuriyetiniñ içki siyaset, malümat ve bağ nazirliginiñ vekilleri ve diniy teşkilâtlarnıñ temsilcileri iştirak ettiler.
Qırım MDİ matbuat hızmeti