Qırım Cumhuriyeti ve Sevastopol şeeri musulmanları diniy idaresiniñ “Faydalı ilim” oqutuv-maarif merkezinde “Yañı baar” leyhasınıñ balaları tiş ekiminen körüştiler. Balalarğa musafirlikke bala tiş ekimi Elvira Nafiyeva kelip, yanında çengeniñ maketini ve tiş ekimi qullanğan aletlerni ketirdi. Körüşüvniñ maqsadı – şu zenaatnen tanış olmaq ve tiş ekiminden qorqunıñ ögüni almaqtır. Balalar içün alışıqlı müitte Elvira Nafiyeva tişlerniñ qurulışı, olarğa plombanıñ qoyulması, tişlerniñ doğru baqımı, kariyes ne olğanı ve nasıl peyda olğanı, tişler içün zarar ketirgen ve faydalı olğan aşayt maddeleri aqqında tarif etti. Bundan da ğayrı, ekim tiş fırçısını 2-3 ayda bir deñiştirmek ve tişlerni 2-3 daqqa devamında temizlemek kerek olğanına diqqat çekti.
Ekim balalarğa tişlerini doğru temizlemelerini ögretti, balalar ise, ekimge er saba ve aqşam tişlerini temizlemege söz berdiler.
Balalar tiş ekiminiñ işinen tanış olğan soñ, onıñ aletlerini tutıp baqtılar.
Körüşüvniñ soñunda balalarğa tişlerine eyi baqmaları tileginen tiş fırçıları ediye etildi.
Qırım MDİ matbuat hızmeti
