Aqmescitteki Molodöjnoye qasabasınıñ camisi erkânında qızlar içün yazlıq lager yekünlendi. Lager yarıstatsionar şekilde bir ay devamında çalıştı, qızlar oña aftada üç kere qatnadılar.
Şu vaqıt devamında qızlar abdest almağa ve namaz qılmağa ögrendiler. Oquv programması boyunca ösmürler dua ve surelerni ezberlediler, peyğamberlerniñ ayatları aqqında bilgi aldılar, iman ve İslâm şartlarını ögrendiler, arap elifbesini menimsediler.
Qırım Cumhuriyeti ve Sevastopol şeeri musulmanları diniy idaresiniñ “Faydalı ilim” maarif leyhasınıñ ocası, İslâm temelleri ve Quran ocası Ayşe Duran qayd etkenine köre, qızlar büyük quvanç ile oqup, din aqqında bilgi almağa tırıştılar, ğayretlerini kösterdiler.
“Bu güzel bir ay oldı. Men balalarnen çalışmağa pek begendim. Er bir bala – ayrı bir dünya, olar bizge öz acayıp dünyalarına qapı açqanları içün minnetdarmız”, – dedi Ayşe oca.
Lagerniñ yekünlengenine bağışlanğan bayram tedbiriniñ soñunda balalar içün dostluq kvesti teşkil etildi, mında balalar taqım içinde çalışmağa ögrendiler. Bundan soñ balalar içün tatlı sofra donatıldı ve hatıra bahşışları berildi.
Qırım MDİ matbuat hızmeti
