Акъмесджитте, Къырымтатар академик музыкалы драма театрында «Земаневий дюньяда къоранта къыйметлери: медений ве диний аспектлер» мевзусында тёгерек маса отькерильди. Тедбир Аналар кунюне багъышлангъан «Несущая жизнь» («Аят берген») регионларара миллетлерара форумы мейданында олып кечти.
Форумнынъ эсас нокътасы – эки эксперт, психология илимлери намзети, Къырым муэндислик педагогика университетининъ доценти Таисия Данилова иле Къырым Джумхуриети ве Севастополь шеэри мусульманлары диний идареси диний тедбирлерни тешкиль этюв болюгининъ рехбери Зенифе Аблаеванынъ ортакъ дискуссиясы олды. Олар бирликте къадынлар ве аиле муитинде актуаль проблемаларны белли этмек ве оларны чезмек ёлларыны тапмакъ меселесине ёнелик дискурсны алып бардылар.
Таисия Данилова бирлешмекнинъ муимлигине ургъу япты: «Базы фаркълылыкъларгъа бакъмадан, бутюн къадынларда айны проблемалар бар, биз оларны анджакъ бирлешип, бири-биримизге ярдым этип, чезе билемиз. Бунынъ ичюн джанлы диалог керек, ве биз, иште, оны бугуньки тедбиримиз черчивесинде къурамыз. Биз бутюн аналар ичюн байрам муитини яратмакъ, къараманларымызнынъ хатырасыны анъмакъ ве къараманларымызнынъ аналарына, эйилик ёлунда ичтимаий хызметке озьлерини адагъан чокъбалалы ве джемаат ишлеринде фааль олгъан аналаргъа урьметимизни косьтермек истеймиз».
Зенифе Аблаева ишбу тедбирнинъ тарихий къыйметини къайд этти: «Бугунь, акъикъатен, тарихий бир куньдир. Бельки де, чокъмиллетли Къырымнынъ тарихында ильк кере мусульман ве православ къадынлар бир мейданда гъайретлерини бирлештирип, Ана кунюне багъышлангъан ортакъ бир тедбир кечирдилер. Биз косьтермек истемиз ки, биз, миллий менсюплигимизге бакъмадан, келеджегимиз ичюн буюк месулиет ташыймыз, чюнки айны биз ляйыкъ бир несильни тербие этемиз. Биз даа гузель нетиджелер ичюн бирлешмек керекмиз, хусусан, Махсус арбий операция кечирильген бу куньлеримизде. Бизни къорчалагъан аскерлеримиз ичюн биз ишанчлы джебхе аркъасы олмакъ керекмиз».
Тёгерек масанынъ иштиракчилерини ве мусафирлерини Къырым Муфтисининъ муавини Раим Гъафаров иле Акъмесджит ве Къырым епархиясынынъ къоранта ишлери болюгининъ рехбери, иерей Михаил Шепельский селямладылар.
Тёгерек масанынъ марузаджылары актуаль мевзуларда чыкъышлар яптылар:
Къырым Джумхуриетининъ Сагълыкъ назирлиги янындаки Джемаат шурасынынъ реиси, Русие къадынлар иттифакъынынъ Къырымдаки болюгининъ реиси, «Будем милосердны» («Мерхаметли олайыкъ») хайрие фондунынъ ве «Материнское счастье» («Ана бахты») тешкилятынынъ рехбери Бахарева Нонна. Мевзусы – «Яшларда къоранта тасавурынынъ шекилленюви: эвлиликке ве чокъбалалыкъкъа ёнлендирме».
Филология илимлери докторы, В. И. Вернадский адына Къырым Федераль Университети филология институтынынъ къырымтатар тильшынаслыгъы кафедрасынынъ профессоры, Къырым Джумхуриети Башлыгъы янындаки Къырымтатарлар шурасынынъ кятиби Селендили Лемара. Мевзусы – «Инанч, умют, севги: дюньевий тенълик vs къорантада диний аньанелер».
Православ журналистлер бирлешмесининъ рехбери Хомич Марина. Мевзусы – «Мунакъашадан муаббетликке догъру: айрылышувларнынъ профилактикасы».
«Фемина» клиникасынынъ баш экими, гинеколог Алиева Фатма. Мевзусы – «Къырым Джумхуриетинде къадынларда репродуктив системасынынъ онкохасталыкъларынынъ профилактикасы боюнджа актуаль меселелер».
«Несущая жизнь» форумынынъ кечирилюви Къырымда аньаневий динлернинъ къоранта муэссисесини ве джемиет истикърарыны пекитмек огъурында къургъанлары конструктив диалогнынъ ве ишбирликнинъ парлакъ нумюнеси олды.
Къырым МДИ матбуат хызмети