Aqmescit rayonındaki Tahta Cami (Andrusovo) köyüniñ camisinde Quran oquvı yarışı avgust 11-de, saat 11.00-de keçirilecek. Bundan evel bu konkurs iyül 29-da keçirilecek edi.
Yarış idarecisi, Qırım musulmanları diniy idaresiniñ din ocası Meryem Mujdabayevanıñ bildirgenine köre, merasimniñ keçirilmesi iştirakçilerniñ bazıları hastalanğanı sebebinden diger künge belgilendi.
— Bu yarışta bütün balalarımız iştirak etecegini isteymiz. Çünki olar ğayret ile bütün derslerge qatnadı. Bu talebeler diqqatqa lâyıqlar, — dep, añlattı Meryem Mujdabayeva.
Qayd etmek kerek ki, endi bir qaç ay devamında Tahta Cami köyüniñ camisinde balalar içün Quran oquvı kursı keçirile. Dersler mahsus oyun ve eglence şeklinde berile.
QMDİ MDT matbuat hızmeti