Янъы неширлеримиз

Къырым Джумхуриети ве Севастополь шеэри мусульманлары диний идареси тарафындан янъы неширлер азырланылып бастырылды.
Чокътан бекленильген бир китап оларакъ, къадын мусульманларгъа мураджаат эткен ве Баирова Зейнеб оджа тарафындан азырланылгъан «Настольная книга мусульманки» («Мусульман къадыннынъ эль китабы») дюнья юзюни корьди. Ишбу китап мусульман къадын перспективасындан Ислямнынъ темеллери ве, хусусан, къадынларнен алякъалы меселелерни ачыкълай. Шу джумледен, динимизде темизлик ве темизленюв, ибадет ве Ислямнынъ яшанмасы, мусульман къадыннынъ аилевий ве ичтимаий яшайышы, къоджаларынен къаршылыкълы акъ ве вазифелери, базы шахсий хусуслар ве къадын сагълыгъынен алякъалы меселелер анълатыла. Мусульман къадыннынъ энциклопедиясы маиетинде олгъан шу китап эр бир мусульманнынъ эвинде ер алмалы, ве эр бир мусульман къадыннынъ эль китабы олмасына ляйыкътыр.
Бунен берабер, Къырым мусульманлары диний идареси тарафындан бир къач китапнынъ янъы неширлери бастырылды.
Шу джумледен, Сейфеддин Языджынынъ мешхур «Основы исламских знаний» («Темель диний бильгилер») китабынынъ русча тюзетильген дёртюнджи нешири азырланылып бастырылды. Китапта Ислям динининъ темель диний бильгилери такъдим этиле. Айры болюклер оларакъ, иман эсаслары (акъаид), ибадет, ахлякъ ве сиер – Пейгъамберимизнинъ (с.а.с.) яшайышы акъкъында тариф этиле. Китап энъ кениш окъуйыджылар кутьлесине къарарлаштырылып, эсас темель диний бильгилерни огренмек ичюн мухтелиф диний мусульман окъув юртлары ве курслар ичюн тевсие этиле.
Бундан да гъайры, Къырым Муфтисининъ муавини, фыкъых магистри Айдер Исмаилов тарафындан азырланылгъан «Нововведения и религиозные традиции крымских татар» («Бидат ве къырымтатарларнынъ диний урф-адети») китабынынъ янъы, тюзетильген ве кенишлетильген учюнджи нешири бастырылды. Шу китапта бидатнынъ не олгъаны, онынъ маиети ве хусусиетлери, амельдеки нумюнелери белли ислямий алимлер тарафындан тариф этилюви эсасында ачыкълана. Китапта Хазрет-и Пейгъамбернинъ Суннети боюнджа Къырым мусульманларынынъ аньаневий диний амелияты тахлиль этиле.
Иляве оларакъ, къырымтатар тилинде олгъан «Урф-адетимизге коре дуа мерасими ве тертиби» адлы Энвер Ногашевнинъ китабы янъы редакциядан кечип, дёртюнджи кере бастырылды. Ишбу китапта дуаларымыз насыл алып барылмакъ кереклиги тафсилятлы шекильде, изаатлар ве мисаллер берилерек, басамакъ-басамакъ анълатыла. Бундан да гъайры, дуа этмекнинъ фазилети, дуаларнынъ къабулы ичюн керекли шартлар, дуалар къабул этильген мекян ве вакъытлар, дуа мерасимлерининъ чешитлери, дженазе, ад къоюв, никях ве саире меселелер ачыкълана.