Хазрет-и Пейгъамбернинъ Севбан адында азат этильген бир къулы бар эди. Севбан Аллахнынъ Ресулюни пек севе эди. Ойле севе эди ки, ондан айры къалмагъа ич истемей эди.
Куньлерден бир кунь, джанындан чокъ севгени Ресулюллахны корьмек арзусы иле онынъ янына кельди. Чырайы пек яхшы дегиль эди, баягъы арыкълагъан эди. Озю де кедерли алда эди. Хазрет-и Пейгъамбер бу алыны корьгенде: «Хастасынъмы? Не олды санъа, я, Севбан?», – деп, сорады. Севбан исе: «Не хасталыгъым бар, не де алсызлыгъым. Ич бир шейим ёкъ, эй, Аллахнынъ Ресули», – деди, – «Анджакъ, сени корьмегеним вакъыт, санъа севгим арта ве сени корьгениме къадар кедеримден бунъалам. Сонъ, ахиретни хатырлайым ве анда сени корип оламайджагъымдан къоркъам. Чюнки сен дигер пейгъамберлернен берабер юксек макъамларда оладжакъсынъ. Мен дженнетке кирсем биле, сенинъ дереджеденъ ашагъы оладжагъымдан себеп, сени анда корип оламайджагъымдан къоркъам. Онынъ ичюн сени корип оламайджакъ бир дженнетке кирмеге арзуламайым. Мен, сени коралмайджакъ дженнетке кирмем, я Расуляллах!»
Риваетке коре, Пейгъамбер Эфендимиз (с.а.с.) о арада эндирильген аетнен Севбангъа джевап берди:
«Ким Аллахкъа ве Пейгъаберине итаат этсе, иште, олар Аллахнынъ ниметлерине иришкен пейгъамберлер, сыддыкълар, шеитлер ве салихлер иле берабердир. Булар исе, не гузель аркъадаштыр!» («Ниса» суреси, 4/69 ает).
Эскендер Меметов