Арсен ве Хайрунниса Яглыевлер бир аиле оларакъ диний маариф саасында хызмет этелер. Арсен Яглыев энди 17 йыл девамында Къурман районынынъ баш имамыдыр. Оларнынъ дестеги иле Къурман районында диний курслар, Къуран-и Керим курслары ачыла. Къорантада беш бала осе, олар да балалыкътан хызмет ве диний маариф не олгъаныны билелер.
Арсен бей, Къурман районынынъ баш имамы вазифесини беджересинъиз. Бу ёлгъа насыл кельдинъиз. Сизни ким ильхамландырды?
Арсен Яглыев: Бу ёлгъа озюм кельдим, лякин оджаларым манъа пек ярдым этти. Мен Къалай медресесинде окъугъанымда, Иззет оджам эр заман хызмет акъкъында бойле айта эди: «Биринджиден, бу – эманеттир, экинджиден, – япкъан ишинъни севмек керек». Меним вазифем – бир эманеттир ве Аллахнынъ ризасы ичюн акъкъымны ерине кетирмеге тырышам. Районнынъ баш имамы олмакъ къолай дегиль. Бутюн джамилер, дин джемиетлер меним незаретимде. Эр джума куньлери район боюнджа джамилерге барамыз, джумалар кечиремиз. Незарет этемиз, агъыр вазиетте яшагъан къоранталар акъкъында бильгилер топлаймыз, сонъра бу аилелерге ярдымджы олмагъа арекет этемиз. Имамлыкъ вазифесинден гъайры, оджалыкъ этем. Омюр аркъадашым Хайрунниса оджанен берабер койлерге къатнап, Къуран окъувы ве диннинъ темеллери дерслерини кечиремиз.
Районынъызда не къадар кой бар? Бу койлерде имамлар ве джамилер иле проблемлер ёкъмы?
Арсен Яглыев: Районымызнынъ теркибинде 82 кой бар. Бу койлернинъ 20-синде джами я да ибадетхане чалыша. Бутюн койлер имам я да моллагъа багълы. Бир имам я да молла 3-5 койге бакъа.
Къурманда ярымадада екяне хафызлар медресеси чалыша. Бу медресе акъкъында тариф этинъиз.
Арсен Яглыев: Бизим районымызда буюк джамимиз ве хафызлар медресеси бар. Джами 1999 сенеси къурулды, онынъ ады «Мекке джамиси». Шимдики заманда джами азбарында хафизлер медресеси чалыша. О, 2003 сенеси ачылды ве бугуньки куньде медресеге 6-7 сыныфтан башлап балалар окъушкъа къабул этиле.
Карантин вазиетинде бутюн кутьлевий тедбирлернинъ кечирильмеси ясакъ этильгени себебинден, джума намазлары ве дигер диний тедбирлер отькерильмегени шараитте мусульманлар бутюн ибадетлерни эвде кечире. Бу вакъыт девамында джемаат насылдыр проблемлерге расткельдими?
Арсен Яглыев: Карантин вазиетинде бутюн джамилер къапалы ве джемаат иле ибадетлер кечирильмей. Бу мусульман джемаатымызгъа бираз агъыр келе, амма не япайыкъ, сонъу хайыр олсун. Джемаатымыз яхшы, сабырлы, анълайышлы, проблемлер ёкъ, Аллахкъа шукюр. Садедже, базы мерасимлер боюнджа (дженазе, дуалар) джемаатымызнынъ суаллери олса, телефон этип, сорайлар.
Хайрунниса оджа, вазифенъиз акъкъында тариф этинъиз. Не вакъыт дерслерни кечирмеге башладынъыз? Бу ёлда сизни ким ильхамландырды?
Хайрунниса Яглыева: Мен оджалыкъ вазифемни 2005 сенеси башладым. Башта Къурман джамисинде, сонъра исе, койлерде де дерс бердим. Медреседе алгъан бильгилеримнен пайлашмагъа истедим. Бунынъ ичюн илянлар бердим ве бир къач кунь ичинде телефонлар ачылды, инсанлар дерске къошулмагъа истеклерини бильдирдилер. Бундан сонъ «Файдалы илим» лейхасынынъ оджасы олдым ве айны шекильде дерслер бермеге девам этем. Бундан да гъайры, къызлар медресесинде де оджалыкъ яптым.
Талебелеринъизге энъ эсасы нени ашламагъа тырышасынъыз?
Хайрунниса Яглыева: Дерслеримизде энъ эсасы – Къуран окъумакъ ве темель диний бильгилер огренмек. Аллах севгиси, Онъа итаат, Ресулюллах севгиси, нумюневий бир мусульман олмакъ ве динимизнинъ дигер меселелерини огретемиз. 15 йыл девамында вазифемни авесликнен япам. Джамимизде де семинарлар, субетлер кечириле. Шимдики бу вазиетнен эр шей токътатылды. Сонъунда Аллах хайырлысыны берсин.
Эр бир къадыннынъ биринджи ве эсас вазифеси – аналыкътыр. Чокъ балалы ана олмакънен берабер оджалыкъ вазифесини беджермеге насыл етиштиресинъиз?
Хайрунниса Яглыева: Чокъ балалы ана олмакъ – гузель дуйгъудыр. Эр шей къадынгъа багълы. Мен дерслерге балачыкъларымнен бара эдим. Меселя, биринджи балам дюньягъа кельгенде, 40 куньден сонъ меннен дерслерге къатнады, сонъра битасынен отурды. Экинджиси догъгъанда, о да ильк айлары меннен дерске къатнады, сонъра татасынен берабер эвде къала эди. Бойлеликнен, эписи балачыкълар дерслериме къатнадылар. Шимди исе, эки буюк къызым буюди ве, тата олып, эвде къардашларыны бакъалар. Олар меним ярдымджыларым ве дестекчилерим, Аллах олардан разы олсун!
Бала тербиесинде энъ муими недир?
Хайрунниса Яглыева: Бала тербиесинде энъ муими, биринджиден, оларгъа орьнек олмакътыр. Чюнки балалар ана-бабасына бенъзер, олардан огренелер. Экинджиден, севги ве сайгъы ичинде яшамакъ ве оларгъа да буны ашламакътыр.
Бир къоранта олып, умумий буюк ишни беджересинъиз. Сизге бакъып джемаат нумюне ала. Аиленъизнинъ къыйметлери насыл?
Арсен ве Хайрунниса Яглыевлер: Чокъ балалы аиле олмакъ, керчектен, козьге корюне. Биз ичюн энъ муими – Аллах разы оладжакъ бир къоранта олмакъ ве балаларымызнынъ акъикъий бирер мусульман олып оськенлерини корьмектир. Буюклерге сайгъы, кичиклерге урьмет этип, аятларыны девам этмесини ве, кенди къоранталары олгъан сонъ, бу шейлерни озь балаларына огретмелерини истеймиз.
Бу мубарек Рамазан айында окъуйыджыларымыгъа насыл тилеклеринъиз бар?
Арсен ве Хайрунниса Яглыевлер: Раббимиз бу Рамазан айыны миллетимиз ичюн хайырлы ве мубарек этсин. Бу имтиан дюньясында догъру ёлдан шашыртмасын. Миллетимизге ве бутюн мусульман умметине буюк сабыр, къуветли иман ве къавий сагълыкъ берсин, амин!
Эвелина Аблязова