Бераат геджеси Шабан айынынъ он бешинджи геджесидир. Яни он дёртюнджи ве он бешинджи куньлери арасындаки геджедир. Аллаху Тааля эзельде, ич бир шейни яратмадан эвель, эр шейни такъдир этти, тиледи. Булардан бир йыл ичинде оладжакъ эр шейни Бераат геджесинде мелеклерге бильдире. Къуран-ы Керим Левх-и Махфузгъа бу гедже энди. Ресулюллах Эфендимиз бу геджеде чокъ ибадет ве чокъ дуа эте эди.
Эр йыл Шабан айынынъ он бешинджи, Берат геджесинде, шу сенеде оладжакъ шейлер, амеллер, омюрлер, олюм себеплери, юксельмелер, алчалмалар, яни эр шей Левх-и Махфузда языла. Хадис-и шерифлерде буюрулды ки:
«Рахмет къапылары дёрт геджеде ачыла. Шу геджелерде япылгъан дуа ве тёвбелер ред олмай. Булар: Ораза Байрамынынъ ве Къурбан Байрамынынъ биринджи геджелери, Шабаннынъ он бешинджи (Бераат) геджеси ве Арефе геджеси»;
«Джебраиль алейхи’с-селям манъа кельди. «Тур, намаз къыл ве дуа эт! Бу гедже – Шабаннынъ он бешинджи геджесидир», – деди, – «Бу геджеде ибадет эткенлерни Аллаху Тааля багъышлар. Ялынъыз мушриклерни, буюджилерни, фалджыларны, хасислерни, ички ичкенлерни, фаиз ашагъанларны ве зина япкъанларны афу этмез»;
«Бераат геджесини гъанимет, фырсат билинъиз! Чюнки о, белли бир геджедир. Шабаннынъ он бешинджи геджесидир. Къадир геджеси пек буюк исе де, къайсы гедже олгъаны белли дегильдир. Шу гедже (Бераат геджеси) чокъ ибадет япынъыз. Ёкъса, къыямет куню пешман олурсынъыз!»
Джума, Арефе, байрам, Къадир, Бераат, Мирадж, Ашуре, Мевлит ве Регъаип геджелеринде ибадет этмек чокъ саваптыр. Мухаммед Ребхамий хазретлери «Риязу’н-насыхин» китабында буюра ки:
«Буюк Ислям алими, имам Невевий хазретлери, «Эзкяр» китабында бойле буюра: «Гедженинъ он эки къысымындан бир къысымыны, яни бир сааты къадар онъа къыймет бермек, яни Къуран-ы Керимни ве Ислям алимлерининъ китапларыны окъумакъ, намаз къылмакъ ве дуа этмек, бутюн геджени ибадетнен кечирмек сайылыр. Яз ве къыш геджелери ичюн эп ойледир».