Фатиме (р.а.) – Пейгъамберимизнинъ киеви олгъан Хазрет-и Али эфендимизнинъ анасыдыр. О, яхшылыкъ япмагъа, оксюз ве фукъарелерни бакъмагъа пек севген, федакяр бир ханым эди. Чокъ балалары олгъаны ичюн, акъайына буюк къорантасыны бакъмагъа ярдымджы олгъан. Олар пек де зенгин дегиль эдилер. Эбу Талибнинъ бабасы кечинген сонъ, о, кичик къардашынынъ огълу Мухаммедни (с.а.с.) де озь эвине алгъан. Фатиме (р.а.) оны озь эвляды киби севип, оксюз олгъаныны ич ис эттирмеди. Озь балалары беклеп тургъан вакъытта, башта кичик Мухаммедни (с.а.с.) ашатып, кийиндирип, сачыны тарай эди. Ана севгисинден марум этмемеге тырыша эди. Мухаммед (с.а.с.) озь ювасыны къургъандже, эмджеси Эбу Талибнинъ ве енгесининъ эвинде яшады.
Мухаммед (с.а.с.) пейгъамбер олгъан сонъ, Фатиме (р.а.) мушриклернинъ онъа зарар бермесине пек яна ве оны даима къорчаламагъа тырышкъан. Акъайы Эбу Талибнен берабер оны имае этип, аджыларыны унуттырмагъа чалышкъан. Чокъ кечмеден де, бу юдже даветнинъ тесиринен мусульман олгъан. Анасы киби севген бу ханымнынъ мусульман олмасы Пейгъамберимизни (с.а.с.) пек къувандыргъан эди.
Фатиме (р.а.) мусульманларнен берабер Мединеге кочип, Аллах ёлунда бу федакярлыкъны да япты. Мединеде огълу Али Пейгъамберимизнинъ къызы Фатименен эвленди. Онъа да эм аналыкъ япты, эм сырдаш олды.
Пейгъамберимиз Фатимени (р.а.) даима зиярет этип, гонъюлини ала, онъа ярдым эте эди. Онъа «анам» дей эди.
Мухаммед Пейгъамбер (с.а.с.) Мединеге хиджрет эткенден сонъ дёрт йыл кечти. Бир кунь Пейгъамберимиз (с.а.с.) гъает кедерли эди. Бунынъ себебини сорагъанларгъа: «Бугунь анам вефат этти», – деп айтты. Пейгъамберимиз урбасыны чыкъарып, онъа кефин олсун, деп берди. Дженазе намазыны да озю къылдырды. Атта, мезарына кирип, бираз ятты. Козьлери яшланды, агълай эди. Онынъ бу арекети Фатиме (р.а.) ичюн бир бахшыш эди. Чюнки, бедени тийгени мезар бир дженнет багъчасы олгъан. Сонъра да Фатимени (р.а.) шу мезаргъа къойдылар. Пейгъамберимиз (с.а.с.) къабири башында агълап-агълап, дуа этти. Сахабелер сорадылар:
– Эй, Аллахнынъ Пейгъамбери! Бу ханымгъа косьтергенинъиз мунасебетни башкъа бир кимсеге косьтергенинъизни корьмедик!
Пейгъамберимиз (с.а.с.) бойле джеваплады:
– Чюнки о, меним анам эди. Озь балалары ач олса да, башта мени тойдура эди. Озь балалары эвге кирли олып къайтса да, башта мени ювундырып, сачыма гуль суву якъып, тарай эди. О, меним анам эди. Эмджем Эбу Талибден сонъра, бу апайчыкънынъ манъа япкъан яхшылыгъы къадар япкъан бир кимсени бильмейим. Онъа о бир дюньяда дженнет урбалары кийдирильсин деп, озь урбамны кефин яптым. Мезары кенъ ве раат олсун деп, мезарында яттым».
Къабирине топракъ аткъан сонъ, Пейгъамберимиз (с.а.с.) Аллахкъа бойле ялварды: «Эй, Юдже Мевлям! Онъа мерхамет эт ве оны хайырнен такъдирле! Анамдан сонъ, манъа аналыкъ япты! Озю ач къалып, мени тойдурды. Буны да тек Аллах ризасы ичюн япты. Аллахым! Анам Фатиме бинт Эседни багъышла, онынъ мезарыны кенълештир. Меним ве менден эвельки пейгъамберлернинъ хатыры ичюн, дуамны къабул эйле!»
Бираз сонъра, Пейгъамберимизнинъ (с.а.с.) бетинде тебессюм пейда олды ве о, бойле деди: «Джебраиль бу ханымнынъ дженнетке киреджеги акъкъында хабер этти! Ве Юдже Аллах онынъ дженазе намазына 70 000 мелекни ёллады. Онынъ дженазе намазыны мелеклер де, сизнен берабер, къылдылар».
Иште, Аллахнынъ Пейгъамберине (с.а.в.) нисбетен урьмет, хызмет ве севгининъ маневий бир бедели не къадар гузельдир! Акъайы мусульман олмады, амма, бу ал оны ич токътатмады. О, динине хызмет этип, мусульманларгъа ярдым этип яшады. Аллах бизни дженнетте бу мубарек ханым иле къомшу этсин!
Аллах ондан разы олсун!
Эмине Асанова