Иман – мусульманнынъ энъ буюк къыйметидир, айны иман саесинде инсан Раббине даа якъын ола биле.
Иманны къорчаламакъ – эр бир мусульманнынъ борджудыр. Буны япмакъ ичюн базы тевсиелерге риает этмели.
Иман ичюн миннетдар олмакъ.
Бир мусульман онъа берильген ниметлер ичюн Аллахкъа шукюр этмектен ёрулмаз. Ниметлернинъ энъ буюги – имандыр. Юдже Раббимиз исе, шукюр эткенге даа чокъ береджегини ваде этти. Яни иманымыз ичюн миннетдар олсакъ, Раббимиз оны къорчалар.
Иманнынъ къавийлешмеси ичюн дуа этмек.
Юдже Раббимиз бизге иманны багъышлай. Биз исе, оны сакъламакъ ичюн дуа этмелимиз.
Меселя, Къуранда огретильген бойле дуа окъула биле:
[Раббена ля тузигъ къулюбена баде из хедейтена ве хеб лена миль ледунке рахметен иннеке энте’ль-веххаб].
«Раббимиз! Бизге хидает ёлуны косьтерген сонъ юреклеримизни шашыртма, бизге озюнъден мерхамет багъышла, Сен, керчектен, Багъышлайыджысынъ!» («Аль-и Имран» суреси, 3/8).
Бундан да гъайры, меселя, Пейгъамберимизнинъ шу дуасы япыла биле:
[Я, мукъаллибе’ль-къулюби себбит къальби аля диник].
«Эй, къальплерни (истегени киби) денъиштирген (Аллахым)! Юрегимни дининъ узьре пекит» (Тирмизий, Ахмед).
Иманны къавийлештирген амеллер япмакъ.
Иманны пекитмек ичюн энъ эвеля динимизнинъ диреги – намаз ибадетини ерине кетирмек керекмиз. Намазны вакъытында къылмалы. Озь вакъытында къылынгъан намаз – Раббимизнинъ севимли амеллеринден биридир. Намаз, эм де, гунахларнынъ багъышланмасына себе пола ве кунь бою бизлерни тюрлю яманлыкълардан къорчалай.
Иманны пекитмек ичюн, чокъча Аллахкъа зикир этмек керек. Аллахны анъгъан, Оны акъылында тыткъан мусульманнынъ иманы къавийлеше. Меселя, куньде 100 кере «Ля иляха иллялах» («Аллахтан гъайры илях ёкъ») зикири айтыла биле.
Бундан да гъайры, юкъудан эвель «Кяфирун» суреси окъула биле. Шу суре ширктен къорчалай. Бунъа иляве оларакъ, хадиске коре, «Ихляс» суреси джеэннем атешинден къорчалагъан бир къалкъан кибидир.
Ясакълардан узакъ турмакъ.
Эр бир гунах инсанны Аллахтан узакълаштыра. Гунахлардан ве ясакълардан узакъ турунъыз ве гунахларгъа кетирген амеллерден къорчаланынъыз.
Лейля Сейтмеметова