Керич шеэри чокъ асырлыкъ тарихке малик олгъан къадимий шеэрлеримизден биридир. Учь яндан денъизнен чевреленген Керич ярымадасы шу ерге кельген я да мында шекилленген нидже топлулыкънынъ мескени олгъан. Керич ярымадасы Къырым ханлыгъына аит олгъан девирде, Керич шеэрининъ озю ве онынъ къалеси, 1475-1771 сенелери арасында Османлы девлетине аит олып, Кефе санджагъына кире эди. 1771 сенеси, шеэр Русие укюмдарлыгъына кечкени вакъыт, Керичте 8 джами бар эди. Олардан энъ къадимий сою Дженевиз къалесининъ ичинде ерлеше эди; эки джами шеэрнинъ меркезинде, къалгъан 5 джами Керичнинъ четлериндеки мааллелерде ерлеше эди. Русие императорлыгъы Керичте арбий денъиз уссюни къурып башлагъанынен, Дженевиз къалесини ве османлы джамилерни йыкътырдылар. Арбий шеэрде янъы къанунлар кирсетильди ве къырымтатарларнынъ, эм де четэль адамларнынъ сайысы шеэрде азалып, аман-аман ёкъ дереджеге кельди.
1830 сенелеринден сонъ, Керич шеэринде кене къырымтатар мааллелери пейда олып башлады. Ерли мусульман эалиси ичюн джами заруриети ортагъа чыкъты. Бойледже, 1845 сенеси шеэр акимиети айыргъан сермиягъа Керичте Джума джами къурулды. Весикъаларгъа эсасланаракъ, къайд этмек керек ки, джами дёрткошели, къуббели ве эки минарели эди. Бинанынъ эр кошесинде декоратив кичик куллелер бинаны яраштыра эди.
Экинджи Джиан дженки вакъытында джами бинасы буюк зарар корьди. 1944 сенеси къырымтатарлар сюргюн этильген сонъ, шу бинада кинотеатр, сонъра исе, китапхане ерлештирильген эди. 1990-ынджы сенелернинъ башында исе, ипрангъан джами бинасы мусульманларгъа къайтарылды. Къайд этмели ки, бинанынъ ог тарафы ве пенджерелернинъ асыл шекили бозулмайып сакъланды. Йыллар девамында реставрация ишлери алып барылды ве бугунь де бугунь джами бутюнлей гъайрыдан тикленильди.
XIX асырда къурулгъан Джума джами Керич шеэрининъ эсас мусульман мабеди олып, девлет тарафындан тарихий-медений мирас объекти оларакъ танылды.
2018 сенеси Керичнинъ Джума джамиси янында 33 метрлик минаре къурулды. Джами бир кереден 300-ге якъын мусульманны сыгъдыраджакъ буюкликтедир.
Алие Сеферша